Home » მთავარი » თენგიზე ცერცვაძე: მოვუწოდებ ყველას, მთელს მოსახლეობას, მათ შორის განსხვავებული პოლიტიკური ორიენტაციის მქონე ტელევიზიებს, ექსპერტებს – დავარწმუნოთ მოსახლეობა გაიკეთონ ვაქცინა

თენგიზე ცერცვაძე: მოვუწოდებ ყველას, მთელს მოსახლეობას, მათ შორის განსხვავებული პოლიტიკური ორიენტაციის მქონე ტელევიზიებს, ექსპერტებს – დავარწმუნოთ მოსახლეობა გაიკეთონ ვაქცინა

დაავადებათა კონტროლის ეროვნული ცენტრის ხელმძღვანელი თენგიზ ცერცვაძე „ენდიაის“ კვლევას ეხმაურება, რომლის მიხედვითაც, გამოკითხულთა 41 პროცენტი მიიჩნევს, რომ კორონავირუსის საწინააღმდეგო ვაქცინით აიცრებოდა, ასევე 41 პროცენტი აცრაზე უარს ამბობს.

„ეს ძალიან დიდი პრობლემაა, არამხოლოდ საქართველოში, არამედ მთელ მსოფლიოში და არამხოლოდ კოვიდვაქცინის დროს, არამედ ყველა ვაქცინისას. თქვენ იცით, რომ ძალიან ძლიერია ანტივაქსერების მოძრაობა. აქ სერიოზული მუშაობა მართებთ ჯანდაცვას, სახელისუფლო სტრუქტურებს, დაავადებათა კონტროლის ცენტრს, კლინიკებს, მათ შორის კოვიდ და არაკოვიდ კლინიკებს, სხვადასხვა ექპერტებს.

მოვუწოდებ ყველას, მთელს მოსახლეობას, მათ შორის განსხვავებული პოლიტიკური ორიენტაციის მქონე ტელევიზიებს, ექსპერტებს, ექიმებს, რომლებიც ხშირად შემოდიან ჩვენთან პოლემიკაში სხვადახვა საკითხებზე, კოვიდპაციენტების მართვის სტრატეგიებზე, შემოვიდნენ პოლემიკაში, იყოს დისკუსია, მსჯელობა, მაგრამ ჩემი თხოვნა იქნება, ვაქცინაციის საკითხებში იყოს ერთიანი პოზიცია, რამეთუ აქ 41 პროცენტი ძალიან ცოტაა.

მესმის ვიღაცის ბუნებრივი სკეპტიციზმი, ვიღაცას მოტივი აქვს, რომ ვაქცინა არ გაიკეთოს. ყველა უნდა შევეცადოთ, უთანხმოებები გადავდოთ, აქ ქვეყანა უნდა იყოს ერთიანი. ყველა პოლიტიკური ორიენტაციის, თუ განსხვავებული შეხედულების ექსპერტი უნდა დადგეს ერთად და დავარწმუნოთ მოსახლეობის რაც შეიძლება დიდი მასა, რომ ვაქცინა გაიკეთონ.

ქვეყანაში სამიზნედ ითვლება 60-65 პროცენტი. თუ ჩვენ მივაღწიეთ იმას, რომ ქვეყანაში 60-65 პროცენტი აიცრა, ეს იმას ნიშნავს, რომ ქვეყანაში გვეყოლება იმუნური ფენა, ამას დაემატება ის პაციენტები, ვინც კოვიდი გადაიტანა და ბუნებრივი იმუნიტეტი აქვს. ეს იქნება პრაქტიკულად ასპროცენტიანი გარანტია, რომ ქვეყანაში პანდემიის და ეპიდემიის შემდეგი ტალღები არ იქნება. ის 20 პროცენტი, ვინც დარჩება აუცრელი ან იმუნიტეტის გარეშე, მათთან იქნება ცალკეული შეხვედრები, მაგრამ ეს ვერ მოახდენს გავლენას ვერც ქვეყნის ეკონომიკაზე, ვერც საქმიანი წრეების აქტივობაზე, რამეთუ მათ კლინიკური სექტორი იოლად გაუმკლავდება“, – განაცხადა თენგიზ ცერცვაძემ.

Facebook Comments
x

Check Also

საქართველოში, ბოლო 24 საათში კორონავირუსით 7 ადამიანი გარდაიცვალა

Stopcov.ge-ზე გამოქვეყნებული ინფორმაციის თანახმად, ბოლო 24 საათში კორონავირუსისგან გამოჯანმრთელდა 757 პირი, ხოლო ჯამში გამოჯანმრთელებულთა რაოდენობა ...