Home » მთავარი » საქართველო „თეთრი ბარათის“ კამპანიას უერთდება-გადაიღე სელფი და…

საქართველო „თეთრი ბარათის“ კამპანიას უერთდება-გადაიღე სელფი და…

6 აპრილს საქართველო მეექვსედ უერთდება გაეროს ინიციატივას, რომელიც მსოფლიოში სპორტის საშუალებით მშვიდობის დამკვიდრებისა და განვითარებისკენაა მიმართული და აღინიშნება როგორც სპორტის საერთაშორისო დღე, სახელწოდებით – „საერთაშორისო სპორტის დღე მშვიდობისა და განვითარებისათვის“ (International day of Sport for Peace and Development).

ამასთან დაკავშირებით, 2 აპრილიდან საქართველო უერთდება ე.წ. “თეთრი ბარათის” („#WhiteCard”) კამპანიას, რომელშიც აქტიურ მონაწილეობას მიიღებენ სხვადასხვა სპორტული ფედერაციების წარმომადგენლები, მოქმედი და ვეტერანი სპორტსმენები, ოლიმპიური, მსოფლიოს და ევროპის ჩემპიონები, ჩაერთვებიან საქართველოს რეგიონები.

ეს არის მშვიდობისა და სპორტის ციფრული კამპანია, რომლის მიზანია სპორტში პოზიტიური ღირებულებების წახალისება. ის არის სპორტში ე.წ. “წითელი ბარათის” საპირისპირო სიმბოლო და გამოხატავს ჩართულობას, ტოლერანტობასა და მშვიდობას. კამპანია მთელი მსოფლიოს მასშტაბით იმართება. 4 აპრილს თბილისში დაგეგმილია ვორქშოპი და ფოტოგამოფენა, რომელშიც მონაწილეობას მიიღებენ ეროვნული სპორტული ფედერაციების წარმომადგენლები; 6 აპრილს კი მსოფლიოს მასშტაბით ღონისძიება ერთდროულად გაიმართება სხვადასხვა ქვეყანაში, რომლის ფარგლებშიც მოეწყობა სპორტული აქტივობები, შეჯიბრები და სანახაობები სპორტის მრავალ სახეობაში. თბილისში სპორტულ ღონისძიებებს ვაკის პარკი უმასპინძლებს 11:00 საათიდან.

ბარათის წინა მხარე სრულიად თეთრია, ხოლო უკანა მხარეს დატანილია კონკრეტული მესიჯები და კამპანიაში ჩართვის წესი. კერძოდ:

1. გადაიღე სელფი თეთრი ბარათით;

2. გააზიარე ფოტო სოციალურ ქსელში ჰეშთეგით #WhiteCard” (მხოლოდ ლათინური ასოებით, ისე, როგორც არის მოცემული უშუალოდ ორგანიზაციის გზამკვლევში).

ღონისძიებაში ჩართვის მსურველები ერთმანეთს გამოიწვევენ კამპანიაში ჩართვის მიზნით. ფოტოს ატვირთვის შემდეგ, კამპანიის ინიციატორ ორგანიზაციას შესაძლებლობა ექნება, მოიძიოს ჩართულობის სტატისტიკა სხვადასხვა ქვეყნებში და შეაფასოს აქტიურობის დონე.

წლის მანძილზე გამოვლინდება ყველაზე აქტიური ქვეყანა და გადაეცემა სიმბოლური პრიზი. აღნიშნული ღონისძიება მთელი მსოფლიოს მასშტაბით იმართება და 2018 წელს მასში მონაწილეობა მიიღეს: როჯერ ფედერერმა, ბორის ბეკერმა, ფლორენ მალუდამ, ელენა ისინბაევამ და სხვა არაერთმა ცნობილმა სპორტსმენმა.

Facebook Comments
x

Check Also

გახარია პარლამენტში საპროტესტო აქციის ფონზე შევიდა

დღეს, გიორგი გახარია საქართველოს პარლამენტში საპროტესტო აქციის ფონზე შევიდა. პარლამენტთან “შეცვალეს”  წევრების აქცია მიმდინარეობა. -გვახსოვს ...