საქსტატის ცნობით, ივნისში საქართველოში საარსებო მინიმუმი გაიზარდა, რამაც შრომისუნარიანი ასაკის მამაკაცისთვის 214.5 ლარი შეადგინა

სტატისტიკის ეროვნული სამსახურის მონაცემებით, 2021 წლის ივნისში, მაისთან შედარებით, საქართველოში საარსებო მინიმუმის ოდენობა გაიზარდა.

2021 წლის მაისში, შრომისუნარიანი ასაკის მამაკაცთა საარსებო მინიმუმი 205.6 ლარი იყო, ივნისში კი, ეს მაჩვენებელი რვა ლარითა და 90 თეთრით გაიზარდა, ჯამში კი 214.5 ლარი შეადგინა.

ამასთან, საქსტატის ინფორმაციით, მაისთან შედარებით, ივნისში 7.9 ლარით არის გაზრდილი საშუალო მომხმარებლის საარსებო მინიმუმი და 190.0 ლარს შეადგენს.

მიმდინარე წლიდან, ახალ სტატისტიკურ სამუშაოთა პროგრამის შესაბამისად, აღნიშნული მაჩვენებლის წარმოებას საქსტატი აღარ განახორციელებს (იგულისხმება ორსულიანი, სამსულიანი და ა.შ.). როგორც საქსტატში აღნიშნავენ, ეს ინდიკატორი არ გამოიყენება არანაირი დაგეგმვისა და გადაწყვეტილების მიღების პროცესში.

სტატისტიკის ეროვნული სამსახური საარსებო მინიმუმს მინიმალური სასურსათო კალათის საფუძველზე ადგენს. მინიმალური სასურსათო კალათა კი შრომისუნარიანი ასაკის მამაკაცის ნორმალური სიცოცხლისა და შრომისუნარიანობისთვის ფიზიოლოგიურად აუცილებელი საკვების რაოდენობას შეიცავს. საარსებო მინიმუმის სასურსათო კალათა შედგება 40 დასახელების პროდუქტისგან – პური, ბურღულეული, ხორცი, რძის პროდუქტები, ბოსტნეული და საკონდიტრო ნაწარმი.

Login

Welcome! Login in to your account

Remember me Lost your password?

Lost Password