ნიკოლოზ ბასილაშვილი – ჩანაწერები, რომლებიც გავრცელდა, არის ფარულად ჩაწერილი, კონტექსტიდან ამოგლეჯილი და არ ასახავდა ნამდვილ შინაარსს
საქართველოს პირველი ჩოგანი ნიკოლოზ ბასილაშვილი აცხადებს, რომ ჩანაწერები, რომლებიც ერთ-ერთი ტელევიზიით გავრცელდა, არის ფარულად ჩაწერილი, კონტექსტიდან ამოგლეჯილი და არ ასახავდა ნამდვილ შინაარსს.
„მინდა გამოვეხმაურო ორი დღის წინ, ჩემს წინააღმდეგ შეკვეთილ სიუჟეტს, რომელიც სამარცხვინო ტელევიზიამ მოამზადა: ჩანაწერები, რომლებიც გავრცელდა, არის ფარულად ჩაწერილი, კონტექსტიდან ამოგლეჯილი. არ ყოფილა სრული სახით ნაჩვენები და არ ასახავდა ნამდვილ შინაარსს.
ამ გადაცემით, პირველ რიგში, შეილახა ჩემი შვილის უფლებები, რომელიც სკოლის მოსწავლეა და შესაძლოა მარტივად გახდეს ბულინგის მსხვერპლი.
ჩემი შვილი არის ჩემთვის უპირველესი ადამიანი, მოტივატორი და ვფიქრობ, მხოლოდ ასეთი უზნეო ჟურნალისტების მსგავსად მოაზროვნე ადამიანებმა შეიძლება შეიტანონ ეჭვი ამაში.
ჩემი დუმილი განპირობებული არის ბავშვის ინტერესებიდან გამომდინარე და არ მსურს დეტალებზე საუბარი!
მე პარალელური მართლმსაჯულების გამართვას არ ვაპირებ და ველოდები სასამართლოს გადაწყვეტილებას“, – წერს ბასილაშვილი სოციალურ ქსელში.
ცნობისთვის, შაბათს, ერთ-ერთი ტელევიზიის მიერ გავრცელდა აუდიო ჩანაწერები, სადაც ნიკოლოზ ბასილაშვილისა და მისი ყოფილი მეუღლის ნეკა დოროყაშვილის საუბარი ისმის. ბასილაშვილს ყოფი მეუღლის მიმართ ძალადობას ედავებიან.
