ელენე ხოშტარია: არ გამოვა ეს აფიორა – მამაჩემი არის სოლიკო ვირსალაძის მემკვიდრე და ჰონორარები ერიცხება ყველა მისი დადგმული სპეკტაკლიდან უკვე 25 წელია
პოლიტიკური მოძრაობა „დროას” ლიდერი ელენე ხოშტარია მედიაში გავრცელებულ ინფორმაციას ეხმაურება, რომლის მიხედვითაც მისი ოჯახის წევრის ანგარიშზე რუსეთიდან, პერიოდულად სოლიდური თანხები ირიცხება.
ხოშტარია აღნიშნულ ფაქტს აფიორას უწოდებს.
„ირაკლი რუხაძის მხილებამ ძალიან ააღელვა „იმედი”. მინდა გითხრათ უახლოეს დღეებში კიდევ გაგაცნობთ მასალას რუხაძის კავშირებზე სანქცირებულ ადამიანებთან. ხოშტარიას კრემლიდან ერიცხება ფულიო.
მამაჩემი არის სოლიკო ვირსალაძის მემკვიდრე, თეატრის მხატვრის, რომელიც მე – 20 საუკუნეში მოღვაწეობდა მარიისნკის თეატრში და რომლის სპექტაკლები მთელ მსოფლიოში იდგმება. შესაბამისად, ჰონორარები ერიცხება ყველა მისი დადგმული სპეკტაკლიდან უკვე 25 წელია.
რუსეთის საავტორო ორგანიზაცია რაოსთან გაწყვეტილი აქვს ურთიერთობა. არ გამოვა ეს აფიორა და არც რუხაძეს უშველის ეს. ყველა ფაქტს ოლიგარქიული მმართველობის საყრდენების შესახებ ვამხელ და გადავცემ პარტნიორებს” – წერს ხოშტარია.