“ვარ თუ არა პოლიტპატიმარი?” – ნიკა გვარამიას შეკითხვა საკნიდან, ომბუდსმენობის კანდიდატ ლევან იოსელიანს

პოლიტპატიმარი მედიამენეჯერი, ნიკა გვარამია, 212-ე საკნიდან მორიგ წერილს ავრცელებს და ორ პოლიტიკოსს, ლევან იოსელიანსა და თამარ კორძაიას მიმართავს:

“როგორც პოლიტპატიმარს, სახალხო დამცველობის კანდიდატისთვის ერთი შეკითხვის დასმის უფლება მგონი უნდა მქონდეს და გამოვიყენებ:

Levan Ioseliani, როგორ ფიქრობ, ვარ თუ არა პოლიტპატიმარი და ეთანხმები თუ არა სახალხო დამცველის დასკვნას ამ საკითხზე? (სხვა, მათ შორის ათობით საერთაშორისო ორგანიზაციისას არ გკითხავ)? სახალხო დამცველს ამგვარ საკითხებში სწორხაზოვანბა მართებს და “კი” ან “არა” პასუხით ძალიან დამავალებ. თან “პოლიტ” თუ არა, პატიმარი ვარ ბოლო-ბოლო :))

Tamuna Kordzaia, მოვისმინე შენი პოზიცია ლევანთან დაკავშირებით და თუ პასუხი ვერ მივიღე, შენ უნდა მომიპოვო რამენაირად უნდა გამიგო, ჩემთვის პირველხარისხოვანი მნიშვნელობისაა, ვინ იქნება სახალხო დამცველი. მაგალითად, სტრასბურგის სასამართლოში უკვე არსებული პოზიციის წარსადგენად არ მინდა ლომჯარიას დასკვნა ან გაწვეული დამხვდეს, ან შეცვლილ-დამახინჯებული. ან საქმეში ინტერვენცია ვთხოვო ახალ სახალხო დამცველს და უარი მივიღო. ასე რომ, ამ ვითარებაში, სახალხო დამცველის კანდიდატურის მხარდაჭერა პოლიტპატიმრების წინაშე პასუხისმგებლობის აღებაცაა. შენ რომ ამის არ გეშინია, ვიცი. ხოდა, დამეხმარე იმის გარკვევაში, რა მელოდება.” , – წერს ნიკა გვარამია.