ბათუმის ბულვარში მომხდარ ფაქტზე, პროკურატურამ ერთ პირს ბრალდება წარუდგინა

საქართველოს პროკურატურამ ბათუმის ბულვარში მომხდარ ფაქტზე ერთ პირს ბრალდება წარუდგინა. ამის შესახებ უწყების განცხადებაშია აღნიშნული.

„საქართველოს პროკურატურა, ბათუმის ბულვარში მომხდარი ტრაგიკული ფაქტის გამო, სამძიმარს უცხადებს გარდაცვლილი მცირეწლოვნის ოჯახს.
პროკურატურამ აღნიშნულ სისხლის სამართლის საქმეზე, სამუშაოს წარმოებისას, უსაფრთხოების წესის დარღვევის ფაქტზე, რამაც სიცოცხლის მოსპობა გამოიწვია ერთ პირს ბრალდება წარუდგინა.
შინაგან საქმეთა სამინისტროს მიერ ჩატარებული გამოძიებით დადგინდა, რომ ბრალდებულმა, რომელიც პასუხისმგებელი  იყო ე.წ. გასაბერი ბატუტის კონსტრუქციის მოწყობის, ექსპლუატაციის და უსაფრთხოების წესების დაცვაზე, არაჯეროვნად შეასრულა მასზე დაკისრებული მოვალეობები, კერძოდ ბატუტის მყარ ზედაპირზე არსებულ სამაგრებზე მიბმა, ექსპლუატაციის და უსაფრთხოების წესების დარღვევით განახორციელა.
ბრალდებულის მხრიდან ექსპლუატაციის და უსაფრთხოების წესების დარღვევის შედეგად, ბატუტი, რომელზეც ორი მცირეწლოვანი ერთობოდა, ქარმა რამდენიმე ათეული მეტრის მოშორებით გადაისროლა, რა დროსაც ბავშვებმა სხვადასხვა სახის მძიმე დაზიანებები მიიღეს. მიღებული დაზიანებების შედეგად ერთ-ერთი მცირეწლოვანი საავადმყოფოში მიყვანისთანავე გარდაიცვალა.
რაც შეეხება მეორე დაზარალებულს, სამედიცინო დაწესებულებაში აგრძელებს მკურნალობას.
დაკავებულს ბრალდება საქართველოს სისხლის სამართლის კოდექსის 240 -ე მუხლის მეორე ნაწილით (სამუშაოების წარმოებისას უსაფრთხოების წესის დარღვევა, რამაც სიცოცხლის მოსპობა) წარედგინა.
პროკურატურამ, ბრალდებულისთვის აღკვეთის ღონისძიების სახით პატიმრობის გამოყენების შუამდგომლობით, ბათუმის საქალაქო სასამართლოს უკვე მიმართა.
სისხლის სამართლის საქმეზე გამოძიება გრძელდება დანაშაულთან შესაძლო შემხებლობაში მყოფი, სხვა პირების დადგენის მიზნით”, – აღნიშნულია განცხადებაში.

შეგახსენებთ, 12 მარტს, ბათუმის ბულვარში ქარმა გბატუტი გაიტაცა, რის შედეგადაც ბავშვები დაშავდნენ.

დაშავებული 10 წლის ბავშვი გარდაიცვალა, რაც შეეხება მის სამი წლის ძმას, მისი მდგომარეობა მძიმეა.