ზურაბ ჯაფარიძე – მხარს დავუჭერთ ნიკა მელიასა და ელენე ხოშტარიას – იმედი გვაქვს, ოპოზიციის მხრიდან მხარდაჭერა ექნებათ თბილისში ვიცე-მეროსა და მაჟორიტარობის ჩვენს კანდიდატებს

თბილისში არ დავაყენებთ მერობის საკუთარ კანდიდატს და მხარს დავუჭერთ ნიკა მელია/ელენე ხოშტარიას. ამავე დროს, თბილისში ჩვენ გვეყოლება ვიცე-მერისა და რამდენიმე მაჟორიტარობის კანდიდატი, რომლებიც იმედი გვაქვს, მიიღებენ შესაბამის მხარდაჭერას ოპოზიციური პარტიების მხრიდან, – ამის შესახებ სოციალურ ქსელში „გირჩი – მეტი თავისუფლების“ ლიდერი ზურაბ ჯაფარიძე წერს, რომელსაც „ნაციონალური მოძრაობა“ და ოპოზიციის ნაწილი ვიცე-მერის თანამდებობაზე მისი კანდიდატურის განხილვას სთავაზობს.

ჯაფარიძე თვითმმართველობის არჩევნებისთვის მისი პარტიის გეგმებს განმარტავს, ასევე ასახელებს მიზეზს, რატომ არ გადაწყვიტა თბილისში მერის არჩევნებში კენჭისყრა.

„2 ოქტომბრის არჩევნებისთვის თბილისში შეთანხმებაზე: ყველა კვლევით ერთმნიშვნელოვნად ჩანს, რომ თბილისში მერობის კანდიდატად დადგომის შემთხვევაში, მეორე ტურში გადასვლის შანსი არ მაქვს. ერთადერთი მიზეზი, რის გამოც ეს გადაწყვეტილება შეიძლება მიმეღო, „გირჩი – მეტი თავისუფლებისთვის“ ხმების მაქსიმალური მობილიზაციაა. თუმცა, მე მჯერა რომ ჩვენ ამას ისედაც შევძლებთ – დამოუკიდებელი და გამორჩეული კამპანიით, ისე როგორც, ეს შარშან გავაკეთეთ.

ასევე მჯერა, რომ ამ ადგილობრივ არჩევნებზე მთავარი ამოცანაა, ოპოზიციამ ჯამში აიღოს 58%-ზე მეტი. ამისთვის მნიშვნელოვანია, ოპოზიციამ აჩვენოს, რომ აქეთ ფლანგზე არსებობს კომპრომისების და თანამშრომლობის რესურსი. ეს მნიშვნელოვანია ახლაც და მნიშვნელოვანი იქნება, როდესაც მივაღწევთ ხელახალ საპარლამენტო არჩევნებს და დადგება მომავალი კოალიციური მთავრობის შესაძლო ფორმირების საკითხი. ამას ელოდება როგორც, ამომრჩევლის მნიშვნელოვანი ნაწილი, ისე ამას ელოდებიან ჩვენი საერთაშორისო პარტნიორები.

2 ოქტომბრისთვის, ყველგან, მთელს საქართველოში, ყველა მუნიციპალიტეტში, „გირჩი – მეტი თავისუფლება“ ეცდება ჰქონდეს პარტიული სია და ჰყავდეს საკუთარი მერობის/გამგებლობის/მაჟორიტარობის კანდიდატები, გამონაკლისი იქნება მხოლოდ თბილისი, სადაც ჩვენ გვექნება პარტიული სია, მაგრამ არ დავაყენებთ საკუთარ მერობის კანდიდატს და მხარს დავუჭერთ ნიკა მელია/ელენე ხოშტარიას. ამავე დროს, თბილისში ჩვენ გვეყოლება ვიცე-მერისა და რამდენიმე მაჟორიტარობის კანდიდატი, რომლებიც იმედი გვაქვს, მიიღებენ შესაბამის მხარდაჭერას ოპოზიციური პარტიების მხრიდან. კოვიდი მოვილიე, სექტემბერში სრულად ფორმაში ვიქნები“, – წერს ჯაფარიძე.