11 სულიან ოჯახს ღია ცის ქვეშ დარჩენა მოუწევს-დედა დახმარებას ითხოვს!

დავით ცხვარაძე

   ქუთაისში, გამსახურდიას 16 ნომერში მცხოვრები მზევინარ მიქაძის  11  სულიანი ოჯახი დახმარებას ითხოვს. მათ დღეს დახმარების თხოვნით ტელე- რადიო-კომპანია ”რიონს” მიმართეს.

მიქაძეების ოჯახი გაუსაძლის პირობებში ცხოვრობს, მათ საცხოვრებელ სახლს შეიძლება ითქვას რომ კარ – ფანჯარა პირობითად აქვს, გაუსაძლისი პირობები, ჩამონგრეული კედლები და მოლოდინი იმისა, რომ მას ამ ავარიული სახლიდანაც გამოსახლება ემუქრება.

მზევინარ მიქაძის 11 სულიან ოჯახს სახლიდან საკუთარი მაზლი ასახლებს. მათ შორის დავა წლების წინ დაიწყო, საცხოვრებელი სახლი მაზლის საკუთრებაა. მიქაძის ამ პრობლემებს ცერემბრალური დაავადებით მყოფი შვილიშვილიც ემატება. ოჯახი დახმარებას ადგილობრივ თვითმმართველობას სთხოვს, მიქაძეების გასაჭირს მისი მეზობლებიც ადასტურებენ.

მზევინარ მიქაძის ოჯახის პრობლემა ცნობილია ვაკისუბნის ადმინისტრაციული ერთეულის წარმომადგენელისთვის. დავით აბუთიძე საუბრისას აცხადებს, რომ მიქაძესა და მის მაზლს შორის დავა წლების წინ დაიწყო, რომელიც დღემდე გრძელდება. აბუთიძე ადასტურებს ოჯახის გასაჭირს, და იმედოვნებს რომ მიქაძეების ოჯახი ღატაკთა პროგრამაში მოხვდება და მას მერია დახმარებასაც გაუწევს.

როგორც თავად აბუთიძე ამბობს ამ ეტაპზე მის უწყებას დახმარების გაწევა არ შეუძლია, მანამ სანამ ოჯახი ადგილობრივ თვითმმართველობას ღატაკთა პროგრამაში ჩასმით არ მიმართავს საცხოვრებელი სახლის გადახურვა ვერ მოხერხდება.

მიქაძეების ოჯახის ხვედრიი კი დღითიდღე მძიმდება, ადვილი შესაძლებელია 11 სულიანი ოჯახი ღია ცის ქვეშ დარჩეს!