„ოცნების ქალაქში“ მცხოვრები ახალგაზრდა ქალი უკვე ოცნებასაც ვეღარ ახერხებს“

ბათუმში, ოცნების ქალაქში მცხოვრებ მარტოხელა მრავალშვილიან დედას სოციალური

დახმარება მოუხსნეს!

   ამ წუთებში „კორუფციასთან ბრძოლის საინფორმაციო ცენტრის“ თავმჯდომარე მერაბ ღოღობერიძე დაგვიკავშირდა და ბათუმში, “ოცნების ქალაქში” მცხოვრები მრავალშვილიანი, მარტოხელა დედის გასაჭირი გვიამბო. ის დღეს მათთან იმყოფებოდა სტუმრად.

– “ბათუმში,  ე. წ. „ოცნების ქალაქში“ ცხოვრობს 27 წლის, 3 შვილიანი მარტოხელა დედა-ლანა კუპრეიშვილი.

ოჯახს არანაირი შემოსავალი არ აქვს, ერთადერთი საარსებო წყარო სოციალური დახმარება იყო და ისიც მოუხსნეს. ვერავინ გვპასუხობს რა მიზეზით მოეხსნა სიდუხჭირეში მცხოვრებ ახალგაზრდა ქალს სოციალური. სამწუხაროდ,  სოციალური სააგენტო დღემდე უნაროა არა მარტო ამ კონკრეტულ ოჯახთან მიმართებაში, არამედ  უამრავი ოჯახების მიმართ. დედა მხოლოდ მეზობლების და ახლობლების იმედად არის. საცხოვრებელი პირობებიც გაუსაძლისი აქვთ.

უსახსრობის გამო დედას წვალებით უხდება საჭმლის მომზადება გაზის ბალონზე, ესეც მაშინ, თუ ვინმე კეთილი ადამიანი პროდუქტს მიაწვდის.  შუქი არ აქვთ და სანთლის შუქზე არიან.

„ოცნების ქალაქში“ მცხოვრები ახალგაზრდა ქალი უკვე ოცნებასაც ვეღარ ახერხებს. ხალხს ყურადღება არ აქვთ, პრობლემა არსებობს და მომგვარებელი არავინაა, კითხვები ჩნდება და არ არსებობს ადამიანი, რომელთანაც მიხვალ და პასუხს გაგცემს! ახლა ყველა ამბობს, წინასაარჩევნო პერიოდია და დახმარება მოსყიდვაში ჩაგვეთვლებაო, მაგრამ ამ ოჯახის პრობლემა დღეს ხომ არ დამდგარა! მათ გასაჭირს ყველა იცნობს, მაგრამ…და უბედურება ისაა, რომ ასეთი ოჯახები საკმაოდ მომრავლდნენ, მათ სასწრაფოდ ესაჭიროებათ დახმარება.”