წყალმომარაგება ბაკურიანსა და გუდაურში უნდა მოგვეგვარებინა, ეს არ უნდა მომხდარიყო

მარიამ ახალკაცი

საქართველოს პრემიერ-მინისტრი გიორგი გახარია ამბობს, რომ ბაკურიანსა და გუდაურში წყალმომარაგების პრობლემა უნდა მოგვარებულიყო და მთავრობას ამ მიმართულებით მეტი პრევენციული მუშაობა მართებდა. „ეს არ უნდა მომხდარიყო“, – განაცხადა მან 9 იანვარს მთავრობის სხდომის დაწყების წინ და აღნიშნა, რომ გასაფრთხილებელია ის ძალისხმევა, რომელსაც საქართველოს მთავრობა ახორციელებს ბოლო წლების განმავლობაში ტურისტების მოსაზიდად.

„სამწუხაროდ, წლის დასაწყისში ზამთრის კურორტებზე გარკვეული გართულებები გვქონდა. მოგეხსენებათ, წყალმომარაგების თვალსაზრისით როგორც გუდაურში, ასევე ბაკურიანში პრობლემები იყო. აქ ერთმნიშვნელოვნად შეგვიძლია ვთქვათ, რომ ჩვენ ეს პრობლემა უნდა მოგვეგვარებინა. ეს არ უნდა მომხდარიყო მიუხედავად იმისა, რომ დღეს ზუსტად ვიცით, გამომწვევი მიზეზები იყო როგორც ობიექტური, ასევე სუბიექტური. თუმცა ის ძალისხმევა, რომელსაც საქართველოს მთავრობა ბოლო წლების განმავლობაში ტურისტების მოსაზიდად ახორციელებს, არის უაღრესად გასაფრთხილებელი. სწორედ ამიტომ უფრო მეტი პრევენციული მუშაობა გვმართებდა. შესაბამისად, დღეს ზუსტად ვიცით გამომწვევი მიზეზები. გვესმის, რომ პრობლემა არის სისტემური და გვესმის, რომ შესაბამისი დასკვნებია გასაკეთებელი, რომელიც უკვე გაკეთდა და ჩვენ 2020 წელი უნდა დავუთმოთ იმას, რომ მომავალ წელს მსგავსი პრობლემა აღარ განმეორდეს“, – განაცხადა გიორგი გახარიამ