პირველივე ტურში გავიმარჯვებთ ისე, რომ ჩვენ არ დაგვჭირდება კოალიციების შექმნა
საპარლამენტო უმრავლესობის წევრი გიორგი კახიანი არჩევნებში „ქართული ოცნების“ გამარჯვებაში დარწმუნებულია და აცხადებს, რომ მმართველ გუნდს კოალიციის შექმნა არ დასჭირება.
ამის შესახებ პარლამენტის თავმჯდომარის მოადგილემ „რუსთავი 2“-ის ეთერში განაცხადა.
„ჩვენთვის მთავარი და პრიორიტეტული არის, ვისაუბროთ პროგრამებზე, იმაზე თუ რას ვთავაზობთ საზოგადოებას, როგორ განვითარდება ჩვენი ქვეყანა უახლოესი 4 წლის განმავლობაში. ამის პარალელურად ვხედავთ რომ ოპოზიციაში ჯერ მაჟორიტარულ ოლქებში ადგილებს ვერ იყოფდნენ, შემდგომ პრემიერობის კანდიდატი ვინ იქნება ამაზე ვერ თანხმდებიან.
ჩემი გადმოსახედიდან, მანდატებსა და პრემიერობის თანამდებობაზე მათ თეორიულადაც არ ექნებათ შანსი. ოპოზიციამ რაღაც აბსურდული დეკლარაციების გაფორმებაზე დაიწყო საუბარი. ეს რა თქმა უნდა „ნაციონალური მოძრაობის“ და მისი ჯგუფების მხრიდან არის ინიცირებული. ჩვენთვის ამას არანაირი არსებითი მნიშვნელობა არ აქვს.
მყარად ვართ დარწმუნებული საზოგადოების განწყობაში ჩვენს მიმართ, ჩვენივე თავსა და ჩვენს წარმატებებში და ჩვენ გვჯერა, რომ პირველივე ტურში არჩევნები მაჟორიტარული ოლქების უმეტესობაში დასრულდება ჩვენი გამარჯვებით და შესაბამისად, ჩვენ არ დაგვჭირდება კოალიციების შექმნა“, – განაცხადა გიორგი კახიანმა.
