გიგა ბოკერია – მელია უნდა იყოს თავისუფალი, რადგან ის პოლიტპატიმარია – „ევროპული საქართველო“ შეთანხმებას არც ერთ შემთხვევაში არ შეუერთდება
“ევროპული საქართველოს” თავმჯდომარის გიგა ბოკერიას განცხადებით, მათი პარტია შეთანხმების დოკუმენტს არც ერთ შემთხვევაში არ შეუერთდება.
მისივე თქმით, შეთანხმების მიღწევამ ივანიშვილის რეჟიმთან ბრძოლის პროცესი წინ ვერ წასწია და პირიქით, დააზიანა.
„ევროპული საქართველო“ არც ერთ შემთხვევაში შეთანხმებას არ შეუერთდება, ჩვენ არ ვიქცევით იმის მიხედვით, ვინ რა პოზიციას დაიკავებს. ვიქცევით ისე, რაც მიგვაჩნია სწორად ქვეყნის ინტერესებისთვის. ნიკა მელიას და გიორგი რურუას გათავისუფლება არის ყველანაირად კარგი ამბავი, თუმცა ერთადერთი ხინჯი რაც ამ პროცესს აქვს არის ის, რომ მეტ-ნაკლები წარმატებით გამოუვიდა ივანიშვილის რეჟიმს ვაჭრობა პოლიტიკური პატიმრებით.
ნიკა მელია უნდა იყოს თავისუფალი, ვინაიდან ის არის პოლიტპატიმარი. მე დარწმუნებული ვიყავი, რომ ხელისუფლებას ყველა შემთხვევაში მოუწევდა მისი გათავისუფლება, ეს იყო ხელისუფლებისთვის პრობლემა ქვეყნის შიგნითაც და გარეთაც, ორივე ფრონტზე. სამწუხაროდ, ამ შეთანხმების მიღწევამ ივანიშვილის რეჟიმთან ბრძოლის პროცესი წინ ვერ წასწია და პირიქით, დააზიანა, მიუხედავად ამისა, ამ ვითარების ამოქაჩვა არის შესაძლებელი ჩვენს მოქალაქეებთან ურთიერთობით, მოტივაციის შექმნით და იმ ვითარების შექმნით, სადაც ივანიშვილის რეჟიმს არალეგიტიმური მეთოდებითაც კი არ გამოუვა ძალაუფლების შენარჩუნება. ამისათვის უნდა გამოვიყენოთ თვითმმართველობის არჩევნები, ვადამდელი არჩევნები, რომელიც აუცილებლად იქნება და როცა საჭიროა, მშვიდობიანი პროტესტიც“, – აღნიშნა გიგა ბოკერიამ.
