ნათია თურნავა: დღეის მონაცემებით, ზაფხულის პერიოდისთვის ჩვენ 350-ზე მეტი ყოველკვირეული ფრენის განაცხადი და მოლოდინი გვაქვს, რაც დადასტურებულია სხვადასხვა ავიაკომპანიიდან
„ძალიან სწრაფად მატულობს იმ ავიაკომპანიების რაოდენობა, რომლებიც ან ზრდიან ყოველკვირეული ფრენების სიხშირეს, ან ბაზარზე ახალი ავიაკომპანიები შემოდიან. ეს ეხება როგორც თბილისის საერთაშორისო აეროპორტს, ისე ბათუმის და ქუთაისის განახლებულ საერთაშორისო აეროპორტებს“, – ამის შესახებ ეკონომიკისა და მდგრადი განვითარების მინისტრმა უწყებათაშორისი საბჭოს შემდგომ გამართულ ბრიფინგზე განაცხადა.
ნათია თურნავას თქმით დღეის მონაცემებით, ზაფხულის პერიოდისთვის მთავრობას 350-ზე მეტი ყოველკვირეული ფრენის განაცხადი აქვს.
მინისტრის თქმით, 2019 წელს, როდესაც იყო ტურისტების რეკორდული რაოდენობა იყო ზაფხულის პიკის სეზონზე, კვირაში დაახლოებით 800 ფრენა სრულდებოდა.
„შეგვიძლია მოლოდინი გვქონდეს, რომ ფრენების დაახლოებით 50% , რომლებიც მოემსახურება ჩვენს მოქალაქეებს, ასევე ტურისტების ჩამოყვანას, აღდგება.
მთლიანობაში უკვე 50-ზე მეტი ქვეყნისთვის არის გახსნილი საქართველოს საზღვარი. აქამდე იყო 47 ქვეყანა და ახლა ემატება კონკრეტული ჩამონათვალი. სულ იქნებაა 55 ქვეყნამდე , საიდანაც ჩვენ უარყოფითი პისიარ ტესტით ვუშვებთ ვიზიტორებს, როგორც საჰაერო, ახლა უკვე სახლემეთო საზღვრებზე. გარდა ამისა, ნებისმიერი ქვეყნიდან ვუშვებთ სრული ვაქცინაციის კურსჩატარებულ ვიზიტორებს . აღნიშნული დინამიკა იმის პროგნოზის საფუძველს იძლევა, რომ ტურიზმი წელს აღდგება იმაზე გაცილებით სწრაფად, ვიდრე ჩვენი საერთაშორისო პარტნიორების კონსერვატიული მოლოდინები იყო წლის დასაწყისში. ეს კი პირველ რიგში ქვეყნის ეკონომიკაზე აისახება.
ტურიზმი თავისთავად არის დიდი დარგი, 8% ჩვენი მთლიანი შიდა პროდუქტის – 2019 წლის ჩათვლით ასეთი სტატისტიკა იყო. მაგრამ ის ასევეა დარგი, რომელსაც აქვს ძალიან დიდი ეფექტი სხვა მოსაზღვრე დარგებისთვის ანუ, ტურიზმი ამუშავებს როგორც ვაჭრობას ასევე ტრანსპორტის სექტორს, სოფლის მეურნეობას, წარმოებას და მოლოდინი გვაქვს, რომ წელს ეს დინამიკა ძალიან დადებითი იქნება“, – განაცხადა ნათია თურნავამ.
