ღარიბაშვილი უნდა გადადგეს, მაგრამ მნიშვნელოვანია ივანიშვილის და საპატრიარქოს პასუხისმგებლობა – დეკანოიძე

“ნაციონალური მოძრაობის” წევრი, ხატია დეკანოიძე თბილისში ბოლო ორი დღის განმავლობაში განვითარებული მოვლენები ეხმაურება.

როგორც დეკანოიძე აცხადებს, ძალადობრივი ჯგუფები ხელისუფლებასთან არიან გარიგებული. მისი აზრით, ამ ყველაფრის შემდეგ პრემიერ-მინისტრი ირაკლი ღარიბაშვილი უნდა გადადგეს.

“ეს ძალადობრივი ჯგუფები ხელისუფლებასთან გარიგებული ჯგუფები არიან, მათ შორის ანაფორას ამოფარებული ჯგუფები საპატრიარქოდანაც, ვინც ცდილობს, საქართველოდან განდევნოს ევროკავშირი და ევროპული ღირებულებები, ასევე ცდილობს, ამ ცივილიზაციას დაუპირისპიროს ბნელი ძალები. შურისძიება იყო ჟურნალისტებზე. დარწმუნებული ვარ, მათ პირდაპირ დავალება ჰქონდათ მიღებული, რომ კრიტიკულ მედიაზე და ყველა ჟურნალისტზე შური ეძიათ, ეს ჩანდა შორიდან. ეს არის უმძიმესი წერტილი სტრატეგიული პარტნიორებისთვის. ეს ყველაფერი არის ჰიბრიდული ომის ნაწილი, როგორც მოქმედებს რუსეთი, მათ შორის საქართველოს ხელისუფლების დახმარებით. ეს არის ის ყველაფერი, რაც არის “ქართული ოცნების” მმართველობის შედეგი. ირაკლი ღარიბაშვილი უნდა გადადგეს. მაგრამ ყველაზე მნიშვნელოვანია ბიძინა ივანიშვილის და საპატრიარქოს პასუხისმგებლობა”,- განაცხადა დეკანოიძემ.

შეგახსენებთ, გუშინ, პარლამენტის შენობის წინ აქცია გაიმართა. აქციაზე შეკრებილები 5 ივლისს მომხდარ ძალადობის ფაქტებს აპროტესტებენ. ადგილზე სამოქალაქო აქტივისტები და ოპოზიციური პარტიის წარმომადგენლები იმყოფებოდნენ. ამასთან, პარლამენტის წინ მიმდინარე აქციის დროს ხმაური და დაპირისპირება რამდენჯერმე იყო. სამართალდამცავებმა დაპირისპირების შედეგად რამდენიმე პირი დააკავა.