“ზურაბ ზვიადაურით ვამაყობდი, ამ ადამიანზე არაფერი ვიცი, ალბათ, მოიქცა ისე, როგორც საჭიროდ ჩათვალა – რა ბიზნესი, რის კრიმინალი, ნუ ამოსვრიან ჩემი პატიოსანი შვილის სახელს ტალახში, ისეთი კეთილი ბავშვი იყო” – 27 წლის მოკლული ნიკა კენჭოშვილის მშობლები
კახეთში, სოფელ წინანდალში მოკლული ნიკა კენჭოშვილის მშობლები ” ტვ პირველთან” საუბრისას უარყოფენ გავრცელებულ ინფორმაციას, თითქოს თავიანთ შვილს ბიზნესი ჰქონდა და ზვიადაურებთან სისხლიანი გარჩევა ბიზნესწილების გამო მოხდა.
“რა ბიზნესი, რის კრიმინალი, ისეთი კეთილი ბავშვი იყო, ფიზიკურად შრომობდა, სწავლა დაამთავრა, მაგრამ ეხერხებოდა ხელობა და წავიდა თავის ბიძაშვილებთან ერთად და შრომობდა ფიზიკურად. უბრალოდ, ნუ ამოსვრიან ჩემი პატიოსანი შვილის სახელს ტალახში. მე ვამაყობდი მაგ სპორტსმენებით, იმათი დედებიც ძალიან მეცოდება.
წამომიდგენია, რა დღეში არიან, მაგრამ რატომ მივიდა 27 წლის ბავშვთან ამხელა კაცები ასეთი საშინელებებით?!” – ამბობს “ტვ პირველთან” ნიკა კენჭოშვილის დედა.
ამასთან, მოკლული,ნიკა კენჭოშვილის მამა ამბობს რომ თავისი ვაჟი წინანდალში სამუშაოდ იყო ჩასული და იგი არანაირ ბიზნეს წილს არ ფლობდა
“ჩემი შვილი მშრომელი, პატიოსანი ბიჭი და ვაჟკაცი ადამიანი იყო. წინანდალში ჩასული იყო იმისთვის, რომ ემუშავა და ფინანსურად დახმარებოდა ოჯახს. ფიზიკუ რად შრომობდა, რა ბიზნეს წილები? მე ზვიადაურით ვამაყობდი. ამ ადამიანზე არაფერი ვიცი, ალბათ, მოიქცა ისე, როგორც საჭიროდ ჩათვალა, მაგრამ მას შეეძლო, უფრო მეტი გაეკეთებინა თავიდანვე. იმ ოჯახს მინდა, პირველ რიგში, მივუსამძიმრო, ვხდები, იქაც რა ხდება”, – აცხადებს “ტვ პირველთან” გარდაცვლილის მამა.
შეგახსენებთ, წინანდალში 16 აგვისტოს 3 ადამიანი მოკლეს, მათ შორის, ერთი ოლიმპიური ჩემპიონის ზურაბ ზვიადაურის ძმა, ზვიად ზვიადაური.
შსს-მ ორი პირი დააკავა. ზურაბ ზვიადაური ერთი ადამიანის განზრახ მკვლელობის ბრალდებით, ხოლო ცეცხლსასროლი იარაღის დაუდევრად შენახვის ბრალდებით, რასაც ადამიანის სიცოცხლის მოსპობა მოჰყვა, 1977 წელს დაბადებული ჯ.ჯ. დააკავეს.
პროკურატურის ინფორმაციით, შინაგან საქმეთა სამინისტროს მიერ ჩატარებული გამოძიებით დგინდება, რომ 2021 წლის 16 აგვისტოს, თელავის რაიონის სოფელ წინანდალში, ე.წ. მუხიანის ტერიტორიაზე, რამდენიმე პირს შორის დაწყებული ურთიერთშელაპარაკება ფიზიკურ დაპირისპირებაში გადაიზარდა, რასაც ორმხრივი სროლა მოჰყვა.
„ვ.ც.-მ ჯ.ჯ.-ს კუთვნილი ცეცხლსასროლი იარაღიდან ცეცხლი გახსნა, რა დროსაც დაპირისპირებაში მონაწილე ნ.კ.-ის მხრიდან საპასუხო სროლის შედეგად ვ.ც. და ზ.ზ. შემთხვევის ადგილზე გარდაიცვალნენ, ხოლო – ზ.მ. და ა.შ. სხეულის სხვადასხვა არეში დაიჭრნენ. მომხდარი დაპირისპირებისას, ასევე კონფლიქტში მონაწილე ზ.ზ.-მ ცეცხლსასროლი იარაღიდან გასროლის დროს, სასიკვდილოდ დაჭრა ნ.კ. სამართალდამცველებმა ზ.ზ. და ჯ.ჯ. 17 აგვისტოს დააკავეს. ზ.ზ.-ს ბრალდება საქართველოს სისხლის სამართლის კოდექსის 108-ე მუხლით (განზრახ მკვლელობა) წარედგინა, რაც სასჯელის სახედ და ზომად 8-დან 15 წლამდე ვადით თავისუფლების აღკვეთას ითვალისწინებს. დაკავებულ ჯ.ჯ.-ს ბრალდება საქართველოს სისხლის სამართლის კოდექსის 238-ე მუხლით წარედგინა (ცეცხლსასროლი იარაღის დაუდევრად შენახვა, რითაც შეიქმნა პირობა მისი სხვა პირის მიერ გამოყენებისათვის, რამაც მძიმე შედეგი გამოიწვია), რაც სამ წლამდე თავისუფლების აღკვეთას გულისხმობს. პროკურატურა ბრალდებულებისთვის აღკვეთის ღონისძიების სახით პატიმრობის შეფარდების შუამდგომლობით თელავის რაიონულ სასამართლოს დღესვე მიმართავს“, – აღნიშნულია პროკურატურის ინფორმაციაში