იაგო ხვიჩია – ნინო ლომჯარია სამყაროში ერთადერთი სახალხო დამცველია, რომელიც ადამიანების ციხეში გამოკეტვას ითხოვს მაშინაც კი, როდესაც ამის აუცილებლობა არ არის
„ნაციონალური მოძრაობის“ არეული მესიჯბოქსი სააკაშვილმა დაალაგა, – ამის შესახებ „გირჩის“ წევრმა, დეპუტატმა იაგო ხვიჩიამ განაცხადა.
ამასთან, როგორც ხვიჩიამ აღნიშნა, ოპოზიცია ლომჯარიას სიტყვებს საჭიროზე ზედმეტ მნიშვნელობას ანიჭებს.
„იქიდან გამომდინარე, რომ ეს თქვა სახალხო დამცველმა, ოპოზიციონერმა კოლეგებმა, რომლებიც ნინო ლომჯარიას სიტყვებს საჭიროზე ზედმეტ მნიშვნელობას ანიჭებენ, ჩათვალეს, რომ უნდა აყოლოდნენ და კომენტარები აკეთეს, თუმცა გუშინ მიხეილ სააკაშვილის განცხადებამ ყველაფერი ადგილზე დააყენა და ზუსტად იგივე გაიმეორა, რასაც ჩვენ ვამბობდით, რომ არჩევნები არ უნდა გადაიდოს და ეს ხელისუფლებას აწყობს. „ნაციონალური მოძრაობის“ არეული მესიჯბოქსი სააკაშვილმა დაალაგა.
რაც შეეხება ნინო ლომჯარიას, სამყაროში ის ერთადერთი სახალხო დამცველია, რომელიც ადამიანების ციხეში გამოკეტვას ითხოვს მაშინაც კი, როდესაც ამის აუცილებლობა არ არის და ადამიანის უფლებების დაცვის ნაცვლად, ხელისუფლებას მოუწოდებს, ადამიანთა განუსაზღვრელი წრის უფლება-მოვალეობები დაარღვიოს იმ იზოლური მოტივებით, რასაც კორონასთან ბრძოლა ჰქვია და რომლის მიზეზ-შედეგობრივი კავშირი დღემდე არ არის დადგენილი. სახალხო დამცველისგან შეზღუდვების დაწესებაზე განცხადება არის არა სახალხო დამცველური, მაგრამ იმედი დავკარგე, რომ ამას სახალხო დამცველს გავაგებინებთ“, – განაცხადა ხვიჩიამ.
