საბჭოთა კავშირში ლენინის ბიოგრაფიას რომ გვაზუთხინებდნენ, ანალოგიურად ავალდებულებენ მოსწავლეებს ბიძინა ივანიშვილის ბიოგრაფია დაიზუთხონ – ზაალ უდუმაშვილი

განათლების სამინისტროს მიერ ბიძინა ივანიშვილის ბიოგრაფიის დამატება მე-9 კლასის სახელმძღვანელოშ  გასაკვირი არ არის იმ მინისტრისგან, რომელიც ივანიშვილს ექვთიმე თაყაიშვილს ადარებს,- ამის შესახებ „ნაციონალური მოძრაობის” დეპუტატმა ზაალ უდუმაშვილმა მე-9 კლასის ისტორიის სახელმძღვანელოსთან დაკავშირებით განაცხადა, რომელსაც განათლების სამინისტროსგან გრიფი აქვს მინიჭებული.

მისი შეფასებით თქმით, ეს არის თანამედროვე ისტორიის გადაწერის მცდელობა.

„ეს არის თანამედროვე ისტორიის გადაწერის მცდელობა, მასში არის სწორედ ის ნარატივი, რასაც ვისმენთ 2012 წლის შემდეგ უმაღლესი თანამდებობის პირების მხრიდან, რომ თითქოს ქართულმა მხარემ დაიწყო ომი. ეს ჩვენ მოსმენილი გვაქვს მათ შორის, პრეზიდენტისგან, პრემიერ- მინისტრისგან, შემდეგ იყო გადაკეთებული ეს ფრაზები. ეს არის ისტორიის გადაკეთების მცდელობა. ყველანაირად ცდილობენ, თუნდაც, ვარდების რევოლუციის მონაპოვარი რამენაირად დააკნინონ, სამაგიეროდ განადიდონ ბიძინა ივანიშვილი სასკოლო სახელმძღვანელოებში. საბჭოთა კავშირში ლენინის ბიოგრაფიას რომ გვაზუთხინებდნენ ხოლმე, ანალოგიურად ავალდებულებენ მოსწავლეებს ბიძინა ივანიშვილის ბიოგრაფია დაიზუთხონ, მაგრამ ეს არ არის გასაკვირი განათლების იმ მინისტრისგან, რომელიც ბიძინა ივანიშვილს ექვთიმე თაყაიშვილს ადარებს“, – განაცხადა უდუმაშვილმა.