იტალიელი ევროპარლამენტარი – უკრაინის წინააღმდეგ ბარბაროსული ქმედება გარკვეულწილად განგრძობად ხასიათს ატარებს და გვახსენებს იმ აგრესიას, რომელიც 2008 წელს საქართველოს მიმართ განხორციელდა

უკრაინის წინააღმდეგ ბარბაროსული და მიუღებელი ქმედება გარკვეულწილად განგრძობად ხასიათს ატარებს და გვახსენებს იმ აგრესიას, რომელიც 2008 წელს საქართველოს მიმართ განხორციელდა და შემდგომ მოლდოვას მიმართ ოკუპაციას, – ამის შესახებ იტალიელმა ევროპარლამენტარმა  ფაბიო მასიმო კასტალდომ განაცხადა.

„ლოგიკურია, რომ სუვერენული სახელმწიფოების ანექსია და ოკუპაცია ის თემაა, რომელზეც ღირს ნერვიულობა და არა მარტო იმიტომ, რომ ეს საერთაშორისო სამართალს ეწინააღმდეგება. ჩვენს კონტინენტზე ასეთი ტიპის მცდელობებს უნდა დავუპირისპიროთ კონკრეტული ტიპის სოლიდარობა თითოეული ქვეყნის მიმართ, რომლებიც საფრთხის ქვეშ არიან და სადაც იგივე გზის განმეორების რისკი არსებობს“, – აღნიშნა ფაბიო მასიმო კასტალდომ.

მისივე თქმით,  ამასთანავე, ყველა ქვეყანამ უნდა დააკმაყოფილოს კოპენჰაგენის შეთანხმებით გაწერილი გაფართოების კრიტერიუმები.

„ტექნიკურად მოლაპარაკების პროცესი ძალიან მნიშვნელოვანია და ის მრავალი წლის განმავლობაში გრძელდება, მაგრამ აუცილებელია მხარდაჭერის კიდევ ერთხელ დადასტურება ევროკავშირის მხრიდან გაფართოებასთან დაკავშირებით უკრაინის, საქართველოსა და მოლდოვას მიმართ. ამ მომენტში აუცილებელია გარკვეული მინიშნება, მხარდაჭერის გამოხატვა და მე პირადად, ვიზიარებ პოზიციას, რომ საჭიროა გარკვეული გარანტიები ოფიციალური კანდიდატების მიმართ“, – აღნიშნა იტალიელმა ევროდეპუტატმა ფაბიო მასიმო კასტალდომ.