ედუარდ სააკაშვილი – სამწუხაროდ, მამაჩემი ყველა ნახვაზე არის უარეს მდგომარეობაში – პოზიტიური სიგნალია, რომ კლინიკაში გადასვლა შესთავაზეს
საქართველოს ყოფილი პრეზიდენტის, მიხეილ სააკაშვილის ვაჟი ედუარდ სააკაშვილი პოზიტიურ სიგნალს უწოდებს სამოქალაქო კლინიკაში გადაყვანასთან დაკავშირებით მამამისისთვის გაკეთებულ შეთავაზებას.
ედუარდ სააკაშვილის თქმით, სახელმწიფოს ეკისრება პასუხისმგებლობა პატიმრობაში მყოფი ყოფილი პრეზიდენტის ჯანმრთელობაზე.
„რაც დააკავეს მამაჩემი, რამდენჯერმე მქონდა მისი ნახვის შანსი. სამწუხაროდ, ყველა ნახვაზე არის უარეს მდგომარეობაში, ვიდრე წინა ნახვაზე, რაც არის მტკივნეული საყურებელი. მე, როგორც მის შვილს, მინდა, რამე გავაკეთოთ, მაგრამ ვართ უძლური. არაფრის უფლება არ გვაქვს მის მკურნალობასთან დაკავშირებით. ერთადერთი, ვისაც რამის გაკეთება შეუძლია, არის სახელმწიფო. მათ აქვთ პასუხისმგებლობა მის ჯანმრთელობაზე. მე გახარებული ვარ. პოზიტიური სიგნალია, რომ შესთავაზეს გადასვლა. ვნახოთ, რა შედეგამდე მივა. როგორც ვიცი, ის აპირებს, რომ დათანხმდეს“, – განაცხადა ედუარდ სააკაშვილმა.
საქართველოს იუსტიციის მინისტრი რატი ბრეგაძე აცხადებს, რომ საქართველოს ყოფილ პრეზიდენტ მიხეილ სააკაშვილს კლინიკა „ვივამედში“ გამოკვლევების ჩატარება შესთავაზეს.
მოგვიანებით, ცნობილი გახდა, რომ სააკაშვილი თანახმაა კლინიკაში გადავიდეს.
