რუსეთი ბელარუსში ტერორისტულ თავდასხმას და მასში უკრაინის დადანაშაულებას გეგმავს- უკრაინის უსაფრთხოების სამსახური
უკრაინის უსაფრთხოების სამსახურის ინფორმაციით, რუსები ბელარუსში ტერორისტული თავდასხმის სახით პროვოკაციას გეგმავენ, რათა ქვეყანა უკრაინის წინააღმდეგ პირდაპირ საომარ მოქმედებებში ჩაითრიონ.
დაზვერვის ინფორმაციით, მოზირის ნავთობგადამამუშავებელ ქარხანაში ტერორისტული თავდასხმის სახით პროვოკაცია იგეგმება, რომელსაც ბელარუსში „ვაგნერელების“ საფარქვეშ გაგზავნილი რუსული სამხედრო და სპეცსამსახურების სადაზვერვო-დივერსიული ჯგუფი ახორციელებს.
“რუსეთის ფედერაცია გეგმავს უკრაინის დადანაშაულებას, რათა კიდევ ერთხელ შეეცადოს მინსკის ჩვენი სახელმწიფოს წინააღმდეგ სრულმასშტაბიან ომში ჩათრევას”, – აცხადებენ უწყებაში.
ბელარუსში დაგეგმილი ტერაქტის შესახებ ინფორმაცია უსაფრთხოების სამსახურმა რამდენიმე წყაროდან მიიღო. მათ შორის რუსეთის ფედერაციის შეიარაღებული ძალების სამხედრო მოსამსახურის ჩვენებიდან, რომელიც უკრაინელმა დამცველებმა ზაპოროჟიეს მიმართულებით დაატყვევეს.
