“მოვუწოდებთ ყველა საპარლამენტო ჯგუფს, რომ თუ იმპიჩმენტის განხილვის საკითხი დადგება, დარბაზიდან გამოვიდეთ და ამ პოლიტიკურ თამაშში „ქართული ოცნება” მარტო დავტოვოთ” – ლევან ბეჟაშვილი

იმპიჩმენტის პროცედურას სამართლებრივ-კონსტიტუციური შინაარსი არ აქვს, „ქართული ოცნებისა“ და პრეზიდენტის მხრიდან, მხოლოდ და მხოლოდ, პოლიტიკური მანიპულაციაა, საზოგადოების ყურადღების სხვა თემებზე გადატანისთვის, – ასე გამოეხმაურა „ერთიანი ნაციონალური მოძრაობის“ პოლიტსაბჭოს თავმჯდომარე, ლევან ბეჟაშვილი პრეზიდენტის იმპიჩმენტის პროცედურას.

„უახლოეს პერიოდში, იმპიჩმენტის პროცედურასთან დაკავშირებით საკონსტიტუციო სასამართლოს გადაწყვეტილება უნდა გახდეს ცნობილი. ჩვენი – „ერთიანი ნაციონალური მოძრაობის” პოზიცია, იმთავითვე ცხადი იყო. ამ პროცედურას სამართლებრივ-კონსტიტუციური შინაარსი არ აქვს, „ქართული ოცნებისა“ და პრეზიდენტის მხრიდან, მხოლოდ და მხოლოდ, პოლიტიკური მანიპულაციაა, საზოგადოების ყურადღების სხვა თემებზე გადატანისთვის. ამიტომ, ამ პროცესში ჩვენ მონაწილეობას არ ვიღებთ და მოვუწოდებთ ყველა საპარლამენტო ჯგუფს, რომ თუ იმპიჩმენტის განხილვის საკითხი დადგება, დარბაზიდან გამოვიდეთ და ამ პოლიტიკურ თამაშში „ქართული ოცნება” მარტო დავტოვოთ”,– განაცხადა ლევან ბეჟაშვილმა.