არ დაგავიწყდეთ – 21 სექტემბერს, 12 საათზე პირჯვარი გადაიწერეთ და ილოცეთ!
21 სექტემბერს, ყოვლადწმინდა ღვთისმშობლის შობის დღეა. სრულიად საქართველოს კათალიკოს-პატრიარქი, უწმინდესი და უნეტარესი ილია მეორე თხოვნით მიმართავს საქართველოს მოსახლეობას :
„21 სექტემბერს მთელი მართლმადიდებელი სამყარო აღნიშნავს ყოვლადწმინდა ღვთისმშობლის შობის დღეს. ჩვენ, როგორც ღვთისმშობლის წილხვედრი ქვეყნის შვილებს, გვმართებს მისდამი განსაკუთრებული პატივისცემის გამოჩენა. სრულიად საქართველოს კათალიკოს-პატრიარქის ლოცვა-კურთხევით ამ დღეს, 12 საათზე, საქართველოს ყველა ტაძარში დაირეკება ზარი 12-ჯერ და ყველამ, სადაც არ უნდა იყოს იგი, უნდა თქვას დედაღვთისადმი სავედრებელი პატარა, მაგრამ ძლიერი ლოცვა: ,,მოწყალებისა კარი განგვიღე, კურთხეულო ღვთისმშობელო”-ბრძანა პატრიარქმა.
ილია მეორე ღვთისმშობლობის დღესასწაულზე საზეიმო წირვას სამების ეკლესიაში ჩაატარებს. ამის შესახებ ილია მეორემ დღევანდელ ქადაგებაზე ბრძანა. დღესასწაულთან დაკავშირებით, სამების საკათედრო ტაძარში ოთხშაბათს, 20 სექტემბერს ლოცვა 18:00 საათზე, ხოლო 21 სექტემბერს საზეიმო ღვთისმსახურება 10:00 საათზე დაიწყება.
