თბილისი 24 ქვეყნისა და 12 პარლამენტის 200-ზე მეტი წარმომადგენელს უმასპინძლებს
2018 წლის 17 ივლისს, 12:00 საათზე, საქართველოს პარლამენტში (რუსთაველის გამზ. 8, თბილისი) გაიმართება ღია პარლამენტის დღე. ღონისძიება ჩატარდება ღია მმართველობის მე-5 გლობალური სამიტის დაწყებამდე ერთი დღით ადრე და 24 ქვეყნისა და 12 პარლამენტის 200-ზე მეტი წარმომადგენელს უმასპინძლებს.
ღონისძიებას გახსნის საქართველოს პარლამენტის თავმჯდომარე, ირაკლი კობახიძე.
კონფერენციის მონაწილეებს მიმართავენ ჰეიდი ჰაუტალა – ევროპარლამენტის ვიცე-პრეზიდენტი, სენატორი ბლანკა ოველარი – ღია პარლამენტის ქსელის ParlAmericas პრეზიდენტი, სანჯეი პრადჰანი – ღია მმართველობის პარტნიორობის (OGP) მთავარი აღმასრულებელი ხელმძღვანელი, და ჰელენ კლარკი – ღია მმართველობის პარტნიორობის (OGP) ელჩი, ახალი ზელანდიის ყოფილი პრემიერ-მინისტრი (1999 – 2008) და გაეროს განვითარების პროგრამის (UNDP) ყოფილი ადმინისტრატორი (2009 – 2017).
საპანელო დისკუსიებს გაუძღვებიან ნილს სკოტი – გაეროს განვითარების პროგრამის (UNDP) ხელმძღვანელი საქართველოში, მუკელანი დიმბა – ღია მმართველობის პარტნიორობის (OGP) თანათავმჯდომარე სამოქალაქო საზოგადოებიდან, და ლორა თორნთონი – ეროვნულ დემოკრატიული ინსტიტუტის (NDI) დირექტორი საქართველოში.
შეხვედრის დასკვნით ნაწილს დაესწრება კატარინა მატერნოვა, ევროკომისიის გენერალური დირექტორის მოადგილე.
საპარლამენტო ღიაობის დღის ორგანიზატორია საქართველოს პარლამენტი ღია მმართველობის პარტნიორობასთან (OGP) თანამშრომლობით, ხოლო მხარდამჭერები – ევროკავშირი (EU), გაეროს განვითარენის პროგრამა (UNDP), აშშ საერთაშორისო განვითარების სააგენტოს დემოკრატიული მმართველობის ინიციატივა (USAID/GGI), გერმანიის საერთაშორისო თანამშრომლობის საზოგადოება (GIZ), ეროვნული დემოკრატიული ინსტიტუტი (NDI) და ინფორმაციის თავისუფლების განვითარების ინსტიტუტი (IDFI).
