საქართველოს რკინიგზა ვეტერანებს მგზავრობის საფასურს უნახევრებს
„საქართველოს რკინიგზის“ მაგისტრალური მიმოსვლის მატარებლებით მგზავრობისას, მომავალი წლიდან 50%-იანი შეღავათით კიდევ 70 000-მდე მოქალაქე ისარგებლებს. ინფორმაციას „საქართველოს რკინიგზის“ წარმომადგენლობა ავრცელებს.
შეღავათი შეეხება: საქართველოს ტერიტორიული მთლიანობისთვის ბრძოლების მონაწილეებს, ამ ბრძოლებში დაღუპულების ოჯახის წევრებს და მარჩენალდაკარგულებს; ასევე, მეორე მსოფლიო ომის ვეტერანებს და ავღანეთის ომის მონაწილეებს.
სს „საქართველოს რკინიგზაში“ აცხადებენ, რომ ეს იყო საქართველოს პრემიერ-მინისტრის, მამუკა ბახტაძის ინიციატივა.
პრემიერის ინიციატივას მთავრობა უახლოეს სხდომაზე დაამტკიცებს, რის შემდეგაც საქართველოს რკინიგზის დირექტორთა საბჭო შესაბამის დადგენილებას 2018 წლის ბოლომდე გამოსცემს.