ანა ბიბილაშვილი – ქალაქს სასიცოცხლოდ სჭირდება ღია, საჯარო სარეკრეაციო სივრცეები, იმიტომ რომ ჰაერის ხარისხით სიკვდილიანობის მძიმე მაჩვენებელი გვაქვს
„ლელოს“ თბილისის მერობის კანდიდატი ანა ბიბილაშვილი და საბურთალოს მაჟორიტარობის კანდიდატი ვატო სურგულაძე დიდი დიღმის მოსახლეობას შეხვდნენ. ადგილობრივები II მიკროს ტერიტორიაზე რეკრეაციული ზონის მოწყობას ითხოვენ და დაგეგმილ მშენებლობას აპროტესტებენ.
ინფორმაციის თანახმად, დიდი დიღმის მოსახლეობამ, 2019 წელს შეგროვებული ხელმოწერების საფუძველზე მონაწილეობა მიიღეს პროექტში idea.tbilisi.gov.ge – „იდეა მერს“, ნომრით 3521. პროექტი ფინალში გავიდა, თუმცა შემდგომი რეაგირება აღარ მოჰყოლია. ტერიტორიისთვის სარეკრეაციო სტატუსის მინიჭების მიუხედავად, 2020 წლის 21 აგვისტოს საქ. მთავრობის N1628 დადგენილებით, აღნიშნული ფართი 49 წლიანი აღნაგობის უფლებით საქართველოს ფეხბურთის ფედერაციას გადასცა.
ბიბილაშვილის განცხადებით, ქალაქში საჭიროა როგორც სპორტული ასევე რეკრეაციული სივრცეები, თუმცა ამ ორის დაგეგმარება არ უნდა ხდებოდეს ადამიანების ნების წინააღდეგ, მისი თქმით, აუცილებელია ნებისმიერი სივრცის მოწყობის დროს, მოსახლეობის უმრავლესობის აზრი მკაცრად იყოს დაცული.
„დიდი დიღმის მოსახლეობა II მიკროს ტერიტორიას იყენებს რეკრეაციულ ზონად, მიუხედავად იმისა, რომ არ არის კეთილმოწყობილი. რადგან მათ სხვა ალტერნატივა, მსგავსი ფართის სახით არ აქვთ. ამ მოთხოვნით მერიას, რამდენიმე წლის წინ მიმართეს, გაიმარჯვეს პროექტში, თუმცა მერიამ მათი სურვილი არ გაითვალისწინა და სივრცე გადაეცა ჯგუფს, რომელიც დახურული სპორტული მოედნის მოწყობას ნიშნავს. რა თქმა უნდა, ჩვენ არ ვართ სპორტული ინფრასტრუქტურის წინააღმდეგები, პირიქით ეს ძალიან საჭიროა, მაგრამ ქალაქს სასიცოცხლოდ სჭირდება ღია საჯარო სარეკრეაციო სივრცეები, იმიტომ რომ ჰაერის ხარისხით სიკვდილიანობის მძიმე მაჩვენებელი გვაქვს, თბილისს სჭირდება ეკოლოგიური მდგომარეობის გაუმჯობესება. ამიტომ იცავენ ეს ადამიანები ამ ტერიტორიას, თავიანთი შვილებსა და მომავალი თაობისათვის. მერია კი რომელიც ამ ხალხის გვერდით უნდა იდგეს, იღებს ერთპიროვნულ გადაწყვეტილებებს და არ უსმენს ადამიანებს. „ლელოს“ ხედვით ნებისმიერი ტერიტორიის განვითარება უნდა მოხდეს ადგილობრივი მოსახლეობის ჩართულობით,“- აღნიშნა ბიბილაშვილმა.
