,,მრცხვენია ამის თქმის, მაგრამ ამერიკაში იმიტომ წამოვედი, რომ საჭმლის ფული არ მქონდა – ივანიშვილმა გამოგვაქცია ქვეყნიდან და დაცალა საქართველო ქართველებისგან” – კობა სუბელიანი
მრცხვენია ამის თქმის, მაგრამ ამერიკაში იმიტომ წამოვედი, რომ საჭმლის ფული არ მქონდა – ახლა გადაზიდვების კომპანიაში ვმუშაობ – ამის შესახებ ლტოლვილთა და განსახლების ყოფილმა მინისტრმა, კობა სუბელიანმა ,,ტვ პირველთან” საუბარში განაცხადა.
მისივე თქმით, ამჟამად ერთ-ერთ გადამზიდავ კომპანიაში მძღოლად მუშაობს.
“2017 წლის ბოლოს წავედი საქართელოდან იმიტომ, რომ ელემენტარული საარსებო არ მქონდა. სამი შვილი მყავს და ოჯახს შენახვა უნდოდა. მრცხვენია ამას რომ ვამბობ, მაგრამ საჭმლის ფული არ მქონდა. არჩევანის წინაშე ვიყავი 2012 წელს – ან უნდა გადავბარგებულიყავი ბიძინა ივანიშვილის გუნდში, ან წავსულიყავი იმ ნაბიჯზე, რაზეც წავედი. წინასწარ ვიცოდი რომ ეს ნაბიჯი სიღარიბით, მარგინალიზაციით, დევნით და ქვების სროლით დასრულდებოდ, ეს და ათასი სხვა უბედურება გადაგვატანინა ,,ქართულმა ოცნებამ”. დღემდე აკეთებენ მსგავსად და ბევრია ასეთი შემთხვევა.
,,ქართული ოცნება” კობახიძე, ღარიბაშვილი და დანარჩენები გამოირჩევიან იმით, რომ აქეთ ედავებიან ხალხს, ეს არის დაცინვა საზოგადოების. რა გამოდის, რომ 80 თუ 60 ლარიანი დახმარების მიღება ურჩევნია ადამიანს, ვიდრე 1000 და 1500 ლარიან სამსახურში მუშაობა?! ეს გამოუვიდათ მათ.
აქაურობა სავსეა ქართველებით. იცით, რა დონის პროფესიონალები არიან აქ? წლები ქვეყანას რომ ემსახურებოდნენ, ივანიშვილმა ისინი სამსახურებიდან გამოყარა და წამოვიდნენ ემიგრაციაში.
მეც ასე ვიყავი, ან უნდა მემათხოვრა ახლობლებისთვის, მეგობრებისთვის თანხები, ან უნდა წამოვსულიყავი. ვერ წარმოიდგენ, რამდენი ადამიანი მიკავშირდება და მთხოვენ, რომ ვასწავლო გზები, თუ როგორ წამოვიდნენ აქ. ლუკმა პური უჭირს ხალხს. გარბიან ქვეყნიდან. ივანიშვილის დაპირება იყო, რომ ემიგრანტებს დააბრუნებდა ქვეყანაში და პირიქით, გასამმაგდა ემიგრაცია.
ამჟამად გადაზიდვების კომპანიაში ვმუშაობ. კალიფორნიის შტატიდან მომაქვს გზავნილი, 5-6 დღიანი მარშრუტია. ასე ვარჩენ ოჯახს. ასეა ქართველების უმრავლესობა, ზოგი ტაქსზე ზის, ზოგი მშენებლობაზე მუშაობს. ემიგრაციას ახლავს ძალიან დიდი სევდა. ჩვენ ივანიშვილმა გამოგვაქცია ქვეყნიდან და დაცალა საქართველო ქართველებისგან” – აღნიშნა სუბელიანმა.