მამუკა მდინარაძე: ღმერთმა დაგვიფაროს, რომ ბრძოლა მოგვიწიოს, ვერ მიგვასწრებს ბრძოლაში ის ხალხი, რომელიც თავის დროზე საკუთარი კორპუსებიდან შიშით უბნებში ვერ ჩამოდიოდა

ღმერთმა დაგვიფაროს, რომ ბრძოლა მოგვიწიოს, მაგრამ ასეთ შემთხვევაში ყველანი ვიბრძოლებთ და ვერ მიგვასწრებს ბრძოლაში ის ხალხი, რომელიც თავის დროზე საკუთარი კორპუსებიდან უბნებში შიშით ვერ ჩამოდიოდა, – ასე უპასუხა „ქართული ოცნების“ აღმასრულებელმა მდივანმა მამუკა მდინარაძემ ჟურნალისტის კითხვას, რომელიც  მედიაში გავრცელებულ ინფორმაციას ეხება.

საუბარია სტატიაზე, სადაც ნათქვამია, რომ გიორგი მარგველაშვილი მიხეილ სააკაშვილის დავალებით უკრაინაში მიემგზავრება, ვიზიტის მიზანი კი საქართველოს ომში ჩათრევაა.

„საქართველო პირველ რიგში უფრთხილდება თავის უსაფრთხოებას და თითოეული ადამიანის სიცოცხლეს, ვინც ამ ქვეყანაში ცხოვრობს. დარწმუნებული ვარ, საქართველოში არ არის ადამიანი, რომელიც ბრძოლაზე უარს აცხადებდეს, გარდა „ნაციონალური მოძრაობისა“, რომელმაც ეს ერთხელ უკვე გააკეთა.

ღმერთმა დაგვიფაროს მომავალში, რომ ჩვენ ბრძოლა მოგვიწიოს, ჩვენ ვიბრძოლებთ და ვერ მოგვასწრებს ის ხალხი, რომელიც თავის დროზე უბნებში ვერ ჩამოდიოდნენ საკუთარი კორპუსებიდან და მართლა ტვინი ნუ წაიღეს ფსევდო პატრიოტიზმით. კორპუსიდან მე-5-7 სართულებიდან ვერ ჩადიოდნენ თავის უბანში შიშით და ის ხალხი ვერ გვასწავლის ჩვენ ვაჟკაცობას. გაითვალისწინონ ესეც, თუ ბრძოლა მოგვიწია ყველანი ვიბრძოლებთ, მთავარია არ მოგვიწიოს ომში ჩართვა და ამისათვის ვაკეთებთ ყველაფერს. ეს არის მათი გეგემა, ისინი არ უფრთხილდებიან ადამიანის სიცოცხლეს, ისინი უფრთხილდებიან მხოლოდ საკუთარ გეგმებს და ამას არ გავატანინებთ. მარგველაშვილი კი არა, ვინც არ უნდა ჩართონ მათ ამ ბინძურ გეგმაში, საქართველოს წინააღმდეგ ბრძოლაში ჩვენ მონაწილეობას არ მივიღებთ“, – განაცხადა მამუკა მდინარაძემ.