წულუკიანმა კიდევ ერთი სასამართლო დავა წააგო – ნახეთ დეტალები
თეა წულუკიანის მიერ ჩატარებული საკადრო წმენდის შედეგად სამსახურიდან გათავისუფლებულმა თანამშრომელმა, გუგა გოგაძემ კულტურის მინისტრს სასამართლო დავა მოუგო – ამის შესახებ ინფორმაციას „სოციალური სამართლიანობის ცენტრი” ავრცელებს.
„სააპელაციომ გააუქმა საქალაქო სასამართლოს გადაწყვეტილება, რომლითაც გუგა გოგაძეს მოთხოვნები არ დაუკმაყოფილდა. მიღებული ახალი გადაწყვეტილებით კი, ბათილად იქნა ცნობილი საქართველოს კულტურული მემკვიდრეობის დაცვის ეროვნული სააგენტოს გენერალური დირექტორის 2022 წლის იანვრის ბრძანება, გუგა გოგაძის შესყიდვების სამსახურის მთავარი სპეციალისტის თანამდებობიდან გათავისუფლების შესახებ.
ამასთან, სასამართლომ სააგენტოს გათავისუფლებული თანამშრომლისთვის კომპენსაციის გადახდაც დაავალა – გათავისუფლების დღიდან გადაწყვეტილების აღსრულებამდე განაცდურის სახით, ხელფასის ოდენობის თანხა. ასევე, გოგაძე ითხოვდა კომპენსაციას, იმისთვისაც, რომ ამ ეტაპზე მისი თანამდებობაზე აღდგენა შეუძლებელია. ეს მოთხოვნა სასამართლომ ნაწილობრივ დააკმაყოფილა და ამისთვის, დამატებით, სააგენტოს 3 ათასი ლარის გადახდა დააკისრა” – წერია ორგანიზაციის მიერ გავრცელებულ განცხადებაში.
