„სატრანსპორტო კომპანია მკაცრად აკონტროლებს მსგავს ფაქტებს“ – თბილისის მერია მეტროში პლაკატების გაკვრასთან დაკავშირებით განცხადებას ავრცელებს
თბილისის მერია მეტროში პლაკატების გაკვრასთან დაკავშირებით განცხადებას ავრცელებს:
„გვსურს, გამოვეხმაუროთ ზოგიერთი მედიასაშუალების მიერ გავრცელებულ ინფორმაციას, თითქოს, თბილისის მეტროსადგურებში საინფორმაციო პლაკატები განთავსდა. ხაზგასმით აღვნიშნავთ, რომ თბილისის მეტროს არცერთ სადგურში პლაკატები არ განთავსებულა და კომპანიის მხრიდანაც არ გაცემულა არანაირი ნებართვა.
თბილისის სატრანსპორტო კომპანია მკაცრად აკონტროლებს მსგავს ფაქტებს და რეაგირებს ოპერატიულად. რაც შეეხება პლაკატებს, განთავსებული იყო რამდენიმე მეტროსადგურის მიმდებარე ტერიტორიაზე და მიწისქვეშა გადასასვლელებში.
აღნიშნულ ფაქტზე კომპანია მოახდენს რეაგირებას, ჩამოიხსნება პლაკატები და ტერიტორიები მოწესრიგდება. გვინდა შევახსენოთ ყველას, დედაქალაქის ქუჩებსა და მიწისქვეშა გადასასვლელებში პლაკატების განთავსება არის კანონდარღვევა და მსგავსი ფაქტის ჩამდენი პირები კანონის შესაბამისად ისჯებიან”, – ნათქვამია განცხადებაში.
შეგახსენებთ, რამდენიმე მეტროსადგურში გაკრული იყო სიძულვილის შემცველი პლაკატები წარწერით – „მოღალატე ჯაშუშები”.
პლაკატებზე გამოსახული იყო ოპოზიციის ლიდერების ფოტოები.
