ხურციძეს WBO-ს დროებითი მსოფლიო ჩემპიონის ტიტული ჩამოერთვა
აშშ-ში დაკავებულ ქართველ მოკრივეს, ავთანდილ ხურციძეს WBO-ს დროებითი მსოფლიო ჩემპიონის ტიტული ჩამოერთვა.
ინფორმაციას ორგანიზაცია ოფიციალურ ვებგვერდზე გამოქვეყნებულ სპეციალური განცხადებით ავრცელებს.
“ვინაიდან ავთანდილ ხურციძე ვერ ასრულებს საკუთარ ვალდებულებებს, როგორც WBO-ს დროებითი ჩემპიონი იბრძოლოს ჩემპიონატზე და ვინაიდან დაგეგმილი ჩემპიონატი გაუქმდა, ამ რეზოლუციით მიღებულ იქნა გადაწყვეტილება, რომ ავთანდილ ხურციძის – საშუალო წონით კატეგორიაში დროებითი ჩემპიონის ადგილი გათავისუფლდეს”, – ნათქვამია განცხადებაში.
აღსანიშანვია, რომ WBO ხურციძეს 10-დღიან ვადას აძლევს გადაწყვეტილების გასაჩივრებისთვის, წინააღმდეგ შემთხვევაში რეზოლუცია საბოლოო იქნება და ვეღარ გადაიხედება.
შეგახსენებთ, რომ 37 წლის ავთანდილ ხურციძემ WBO-ს დროებითი მსოფლიო ჩემპიონის ტიტული 22 აპრილს მოიპოვა ტომი ლენგფორდის ნოკაუტით დამარცხების შემდეგ. დროებითი ჩემპიონის ქამარი ქართველ მოკრივეს 8 ივლისს, ლონდონის Copper Box Arena-ზე, სრულფასოვან ჩემპიონ ბრიტანელ ბილი ჯო სანდერსთან ბრძოლით უნდა დაეცვა, თუმცა მისი დაპატიმრების გამო შეხვედრა გადაიდო.
ქართველ მოკრივეს რეკეტის, თავდასხმის და სხვადახვა სახის თაღლითობის ბრალდებების დადასტურების შემთხვევაში, 20-წლიანი პატიმრობა ემუქრება.
წყარო: mysports.ge