ხანძრის სალიკვიდაციო სამუშაოები ყველა ლოკაციაზე უწყვეტ რეჟმში მიმდინარეობს

შინაგან საქმეთა სამინისტრომ თელავის მუნიციპალიტეტის სოფელ ართანაში, ყვარლის მუნიციპალიტეტის სოფელ შილდას მიმდებარედ, მთა–თუშეთში, სოფელ ხახაბოსთან და ყაზბეგის მუნიციპალიტეტის სოფელ ჯუთასთან გაჩენილ ხანძრებთან დაკავშირებით განცხადება გაავრცელა. 

უწყების განმარტებით, ხანძრის სალიკვიდაციო სამუშაოები ყველა ლოკაციაზე უწყვეტ რეჟმში მიმდინარეობს.

.”შსს–ს საგანგებო სიტუაციების მართვის სააგენტოში გადაუდებელი დახმარების ოპერატიული მართვის ცენტრ „112“–დან შემოვიდა შეტყობინება, რომ თელავის მუნიციპალიტეტის სოფელ ართანაში, ტყის მასივში, ხანძარი გაჩნდა. შეტყობინების მიღებისთანავე, ადგილზე ოპერატიულად მივიდნენ შსს–ს მეხანძრე–მაშველები. რთული რელიეფის გამო, ხანძრის ეფექტური ლოკალიზების მიზნით, ცეცხლის ქრობის პროცესში ჩაერთო ვერტმფრენი. ამჟამად ცეცხლის ძირითადი კერები ლოკალიზებულია.

ხანძარი გაჩნდა, ასევე, ყვარლის მუნიციპალიტეტის სოფელ შილდას მიმდებარედ, ტყის მასივში. ხანძრის ქრობის პროცესში, შსს–ს მეხანძრე–მაშველებთან და ეროვნული სატყეო სააგენტოს თანამშრომლებთან ერთად, ასევე, ჩართულია ვერტმფრენი.

ათეულობით მეხანძრე–მაშველი და შსს-ს ვერტმფრენი ახორციელებს მთა–თუშეთში, სოფელ ხახაბოსთან მდებარე ტყის მასივში გაჩენილი ხანძრის სალიკვიდაციო სამუშაოებს.

ყაზბეგის მუნიციპალიტეტის სოფელ ჯუთას მიმდებარედ, ალპურ ზონაში, ბალახზე გაჩენილი ხანძრის ლიკვიდაციის მიზნით, მობილიზებულია შსს-ს ათობით მეხანძრე-მაშველი, შესაბამის ხანძარსაწინააღმდეგო ტექნიკასთან ერთად.

ოთხივე ლოკაციაზე სამუშაოები უწყვეტ რეჟიმში მიმდინარეობს, რათა დროულად მოხდეს ცეცხლის ლიკვიდაცია.”- ნათქვამია შსს-ს მიერ გავრცელებულ განცხადებაში