ლიბერთი ბანკი გაიყიდა – გარიგება შედგა
უკვე ცნობილია, რომ ლიბერთი ბანკის აქციათა 74.64%-იანი წილი ნიდერლანდების სამეფოში დაარსებულმა კომპანიამ European Financial Group B.V.-მ (EFG) შეიძინა.
გარიგება შედგა, რის შედეგად ბანკის ბენეფიციარი მესაკუთრეები გახდნენ ირაკლი რუხაძე (აშშ-ის მოქალაქე), ბენ მარსონი (გაერთიანებული სამეფოს მოქალაქე) და იგორ ალექსეევი (აშშ-ის მოქალაქე).
“ეს გარიგება ბანკის სტრატეგიული განვითარებისა და მომავალი ზრდისთვის პოზიტიური შედეგის მომტანია, რადგან „EFG“-ის მფლობელები არიან წარმატებული ბიზნესმენები, რომლებიც საქართველოში დიდი ოდენობის აქტივებს ფლობენ და მართავენ; მათ გააჩნიათ საქართველოს ბიზნეს სექტორის და განსაკუთრებით საბანკო სექტორის სიღრმისეული ცოდნა”, – აცხადებს ბანკის მენეჯმენტი და ელოდება, რომ ბანკი ზრდას და განვითარებას გააგრძელებს ახალ აქციონერებთან ერთად, საკუთარი კლიენტებისა და საქართველოს საბანკო სექტორის უკეთესად მომსახურებისთვის.
კიდევ ერთი დეტალი – 13 ოქტომბერს ლიბერთი ბანკის აქციებზე მსხვილი გარიგებაც დაფიქსირდა. უკვე ცნობილია, რომ გასხვისდა ბანკის 3,201,321,628 აქცია, რაც მთლიანობაში ბანკის 58.18%-ია. გარიგების ღირებულებამ 83,170,335.90 ლარი შეადგინა – არასაბირჟო გარიგებით.
ისიც უნდა აღინიშნოს, რომ გარიგების შედეგად, თითო აქციაში 0.02598 ლარი გადაიხადეს, ბანკის საბაზრო კაპიტალიზაციამ კი 233,846 მლნ ლარი შეადგინა.