“ოქმები არ ასახავს ამომრჩევლის ნებას…”
„ნაციონალური მოძრაობა“ ცესკო-ს მიერ ხელმოწერილ ოქმებს კანონით დადგენილ ვადებში ასაჩივრებს და სასამართლოში ამ ოქმების ბათილებას მოითხოვს. პარტიის საგანგებოდ გამართულ ბრიფინგზე ზაზა ბიბილაშვილმა თვითმმართველობის არჩევნებზე გამოვლენილ დარღვევებზე ისაუბრა. მისი თქმით, ადილი ჰქონდა ადმინისტრაციული რესურსის გამოყენებას, კარუსელების პრაქტიკას, მოსყიდვასა და დაშინებას.
“პარტიული ნიშნით დაკომპლექტებულმა ცესკო-მ იდილიურ გარემოში შეაჯამა თბილისის მერის და საკრებულოს არჩევნები შედეგები და დაამტკიცა შემაჯამებელი ოქმები. ეს ოქმები არ ასახავს ამომრჩევლის ნებას, ეს არჩენები არ იყო თავისუფალი და სამართლიანი. წინასარჩევნო გარემო არაკონკურენტულ გარემოში ჩატარდა, არჩევნების დღეს ადგილი ჰქონდა ფუნდამენტურ დარღვევებს, რამაც გავლენა იქონია შედეგებზე. ეს არჩევნები იყო სხვა არაფერი თუ არა სპეცოპერაცია,”- აღნიშნა ბიბილაშვილმა.
„ნაციონალური მოძრაობის“ ინფორმაციით, ყველა ოპოზიციური პარტია იზიარებს მოსაზრებას, რომ არჩევნები ფუნდამენტური დარღვევებით ჩატარდა. ბიბილაშვლის თქმით, ენმ ამ პარტიებთან თანამშრომლობას გააგრძელებს.
