დიანა გელაშვილი: ასეთ აქციებს ხშირად ვედექი სათავეში და შემდეგაც ვაპირებ გავაგძელო
დღეს „თავისუფალი დემოკრატების“ ხაშურის ორგანიზაციის ახალგაზრდული ფრთის წევრებმა ხაშურის მაჟორიტარობის კანდიდატთან, დიანა გელაშვილთან ერთად ოსიაურის ,,ბატონის ბაღი” დაასუფთავეს.
აქციის შემდეგ ჩვენ დიანა გელაშვილს დავუკავშირდით.
-საკმაოდ კარგი აქციაა, საინტერესოა, ერთჯერადი სახისაა თუ შემდეგშიც გაგრძელდება? ხომ არ ემსახურება ეს აქცია წინასაარჩევნოდ ქულების დაწერას და გამარჯვების შემთხვევაში თუ გაგრძელდება ასეთი აქციები?
-სუფთა და ეკოლოგიურ გარემოში ცხოვრება ყველას მოთხოვნა და სურვილია. ჩვენ ერთმანეთს უნდა მივცეთ ბუნების მოვლის მაგალითი, თვალი არ უნდა დავხუჭოთ იმ ნაგავზე, რაც ჩვენს გარშემოა, არ უნდა გვეგონოს, რომ გარემოს დასუფთავება სხვისი და არა ჩვენი საქმეა, შევიწუხოთ თავი და დავასუფთავოთ გარემო ჩვენს გარშემო. სამწუხაროა, რომ ასეთ აქციებში ადგილობრივი თვითმმართველობა არც მონაწილეობას იღებს და არც ორგანიზატორად გამოდის, არადა წესით ამ ძალიან მნიშვნელოვან საქმეში ადგილობრივ თვითმმართველობას ლომის წვლილი უნდა მიუძღვის. ასეთ აქციებს ხშირად ვედექი სათავეში და ამის შემდეგაც ვაპირებ გავაგძელო. მე მრცხვენია ყველა იმ ადამიანის ნაცვლად, ვინც ანაგვიანების გარემოს.
-ფოტოებზე ჩანს ტრაფარეტები, რა ტრაფარეტებია? დღეს დადგით დასუფთავების შემდეგ?
-კი, დღეს დავდგით ტრაფარეტები, რითაც კიდევ ერთხელ გვინდა შევახსენოთ ადამიანებს, რომ ჩვენს მიერ განადგურებული ბუნება შველას ითხოვს და ეს ყველას გასაკეთებელია!
ეს ისტორიული და ულამაზე ბაღი ცენტრალური გზის პირასაა და უნიკალური ასწლოვანი ხეებითაა გარშემორტყმული.
რაიონისთვის ეს უნიკალური ბაღი იმსახურებს მეტ ყურადღებას ადგილობრივი თვითმმართველობის მხრიდან, კეთილმოწყობას და რეკრეაციული ზონის სტატუსის მინიჭებას, სადაც შეიძლება უამრავი ძალიან საინტერესო და ინოვაციური პროექტის განხორციელება, თუმცა დღეს ეს ადგილი ნაგვითაა სავსე. ჩვენ ძალიან მოტივირებული და გონიერი ახალგაზრდები გვყავს და ბევრ საინტერესო და აქტუალურ პროექტს შევთავაზებთ ახალგაზრდებს და განვახორციელებთ მათთან ერთად.