ნიკა მელია – ისეთი თვალწარმტაცი რომ ვიყო, როგორიც ქალბატონი კელი დეგნანია, პარლამენტში შესვლასთან დაკავშირებით იმავე განცხადებას გავაკეთებდი
ერთიანი ნაციონალური მოძრაობის“ თავმჯდომარე, ნიკა მელია ოპოზიციის პარლამენტში შესვლასთან დაკავშირებით საქართველოში ამერიკის შეერთებული შტატების ელჩის კელი დეგნანის მოწოდებაზე ამბობს, რომ ელჩის ადგილას, თავადაც მსგავს მოწოდებებს გააკეთებდა და ეს სრულიად ბუნებრივია.
„მეც რომ ვიყო კელი დეგნანი ახლა, რომ ვიყო ისეთი თვალწარმტაცი, როგორიც არის ქალბატონი კელი დეგნანი, იგივე განცხადებას გავაკეთებდი. მე რომ ვიყო ელჩი, ელჩის გადმოსახედიდან იგი აკეთებს სწორ განცხადებას. გინახავთ თქვენ ელჩი, რომელიც არ ცდილობს, დაიყოლიოს ბოიკოტის რეჟიმში მყოფი ოპოზიცია, რათა შევიდეს პარლამენტში. ასეთი არ არსებობს. არაჩვეულებრივი ადამიანია, მათ შორის გარეგნული თვალსაზრისით. სწორად იქცევა ქალბატონი კელი დეგნანი, როცა კეთდება მსგავსი განცხადება. ის ცდილობს თავის მაქსიმუმს. მის ადგილზე ყველა ელჩი და კიდევ ერთხელ ვიმეორებ, მეც რომ ვიყო ქალბატონი კელი დეგნანის ადგილზე, იგივენაირად მოვიქცეოდი. ის არ ამბობს, რომ არჩევნები არ გაყალბდა, ქალბატონი დეგნანი ამბობს და ხაზს უსვამს, რომ ქვეყანაში დაიკარგა რწმენა არჩევნების მიმართ“, – განაცხადა ნიკა მელიამ.
