რამზან კადიროვი – ჯო ბაიდენის ავადმყოფობასთან გასამკლავებლად ამერიკული მედიცინა უძლურია, გროზნოში ვეპატიჟებით, ჩვენ ვუმკურნალებთ ან მინიმუმ შევეცდებით აღვუდგინოთ მეხსიერება

ჩეჩნეთის ლიდერი რამზან კადიროვი ამერიკის შეერთებული შტატების პრეზიდენტს ჯო ბაიდენს კაცობრიობისთვის საშიშს უწოდებს. როგორც რუსული მედია იუწყება, ამის შესახებ კადიროვმა სოციალურ ქსელ „ტელეგრამში“ დაწერა.

„მართალი გითხრათ, ბაიდენი გაცილებით განათლებულ ადამიანად წარმომედგინა. ვფიქრობდი, რომ მას თავისი ფხიზელი შეხედულებები ჰქონდა დანარჩენ მსოფლიოსთან ურთიერთობების გასავითარებლად. მე ვცდებოდი.

ერთმნიშვნელოვნად, ბაიდენს ესაჭიროება მკურნალობა და არა ქვეყნის მართვა. ადამიანმა, რომელმაც არ იცის, რა ჰქვია ამერიკის თავდაცვის მინისტრს, არ იცის ძალოვანი სტრუქტურების სახელწოდება, რეალურად საშიშია საზოგადოებისთვის. ვფიქრობდი, ის მხოლოდ ჩვენი საწინააღმდეგო სანქციებით იყო საშიში, მაგრამ როგორც ვრწმუნდებით, ბაიდენი მთელი კაცობრიობისთვის არის საშიში.

იმის გათვალისწინებით, რომ ამერიკული მედიცინა მის ავადმყოფობასთან გასამკლავებლად უძლურია, ვეპატიჟები აშშ-ის პრეზიდენტს გროზნოში – ჩვენ ვუმკურნალებთ ჯო ბაიდენს ან მინიმუმ შევეცდებით აღვუდგინოთ მეხსიერება“, – წერს კადიროვი.

შეგახსენებთ, გუშინ აშშ-ის პრეზიდენტმა ჯო ბაიდენმა განაცხადა, რომ რუსეთის პრეზიდენტი ვლადიმერ პუტინი აშშ-ის 2020 წლის საპრეზიდენტო არჩევნებში ჩარევისთვის „საფასურს გადაიხდის“.

ამასთან, ჟურნალისტის კითხვაზე, მიაჩნია თუ არა, რომ ვლადიმერ პუტინი მკვლელია, ბაიდენმა უპასუხა –  „დიახ“. აღნიშნული განცხადებების საპასუხოდ მოსკოვმა აშშ-ში რუსეთის ელჩი კონსულტაციებისთვის გაიწვია.