დიდ დიღომსა და სოფელ დიღომში სტიქიით მიყენებული ზიანის სალიკვიდაციო სამუშაოები მიმდინარეობს, 7 სახლის სახურავის განახლებას გამგეობა უზრუნველყოფს
თბილისის მერიის ინფორმაციით, წვიმის შედეგად დიდ დიღომში 7 საცხოვრებელი სახლის სახურავი დაზიანდა, რომლის განახლებას საბურთალოს რაიონის გამგეობა უზრუნველყოფს. როგორც მერიის განცხადებაშია ნათქვამი, წუხანდელი ძლიერი წვიმის შედეგად, საბურთალოს რაიონში, დიდი დიღმისა და სოფელ დიღმის კერძო დასახლებების ქუჩები, ასევე, რამდენიმე კერძო სახლი და მირიან მეფის ქუჩა დაიტბორა. სტიქიით გამოწვეული ზიანის სალიკვიდაციო სამუშაოები თბილისის მუნიციპალიტეტის მერიის შესაბამისმა სამსახურებმა, საბურთალოს რაიონის გამგეობამ და საგანგებო სიტუაციების მართვის სამსახურმა მყისიერად დაიწყეს. დატბორილი სახლებიდან და ეზოებიდან წუხელვე ამოიტუმბა წყალი. ამჟამად, „თბილსერვის ჯგუფის“ ბრიგადები დატბორილ ქუჩებს წმენდენ.
