თეთრი სახლი: ჯო ბაიდენთან საუბრის შემდეგ, აშშ ყურადღებით დააკვირდება ჩინეთის ლიდერის ქმედებებს
ჯო ბაიდენთან საუბრის შემდეგ, აშშ ყურადღებით დააკვირდება ჩინეთის ლიდერის ქმედებებს, – განაცხადა თეთრი სახლის ოფიციალურმა წარმომადგენელმა, ჯენ ფსაკიმ.
„ჩვენ გვაქვს ეს შეშფოთება. პრეზიდენტმა განმარტა, რა შედეგები დადგება, თუ ჩინეთი მატერიალურ დახმარებას გაუწევს რუსეთს მაშინ, როდესაც რუსეთი სასტიკ თავდასხმებს ახორციელებს უკრაინის ქალაქებსა და მშვიდობიანი მოსახლეობის წინააღმდეგ. ეს არის ის, რასაც ჩვენ და მსოფლიოც ვაკვირდებით“, – აღნიშნა თეთრი სახლის ოფიციალურმა წარმომადგენელმა.
ჯენ ფსაკის თქმით, ჩინეთმა თავად უნდა მიიღოს გადაწყვეტილება, სად სურს ყოფნა.
აშშ-ის პრეზიდენტმა, ჯო ბაიდენმა ჩინეთის ლიდერი, სი ძინპინი გააფრთხილა, რომ პეკინი დიდ ფასს გადაიხდის, თუ რუსეთის უკრაინაში შეჭრას მხარს დაუჭერს.
„საუბარი შეეხო რუსეთის შეჭრას უკრაინაში. პრეზიდენტმა ბაიდენმა ხაზი გაუსვა შეერთებული შტატების და ჩვენი მოკავშირეების და პარტნიორების შეხედულებებს ამ კრიზისის შესახებ. პრეზიდენტმა ბაიდენმა დეტალურად აღწერა ჩვენი ძალისხმევა, რათა თავიდან ავიცილოთ და შემდეგ ვუპასუხოთ შეჭრას, მათ შორის რუსეთისთვის ხარჯების დაკისრებით. მან აღწერა შედეგები, თუ ჩინეთი მატერიალურ დახმარებას გაუწევს რუსეთს, რადგან რუსეთი სასტიკ თავდასხმებს ახორციელებს უკრაინის ქალაქებსა და მშვიდობიანი მოსახლეობის წინააღმდეგ. პრეზიდენტმა ხაზი გაუსვა კრიზისის დიპლომატიური გზით გადაწყვეტის მხარდაჭერას“, – ნათქვამია განცხადებაში.
