„პატრიოტთა ალიანსი” თარხან მოურავისა და ირმა ინაშვილის მეთაურობით ოკუპანტებთან რუსეთში შეხვედრებს მართავს
„საქართველოს პატრიოტთა ალიანსი” დავით თარხან მოურავისა და ირმა ინაშვილის მეთაურობით ოკუპანტებთან რუსეთში შეხვედრებს მართავს. ინფორმაცია 4 აპრილს რუსეთის ფედერალური საბჭოს ოფიციალურ ვებგვერდზე გამოქვეყნდა.
შეხვედრას რუსული ფედერალური საბჭოს მხრიდან საბჭოს საგარეო ურთიერთობათა კომიტეტის თავმჯდომარის მოადგილე ვლადიმირ ჯაბანოვი და ამავე კომიტეტის კიდევ ერთი წევრი მიხეილ სინიცინი ესწრებოდნენ.
„ჩვენს ქვეყნებს მრავალსაუკუნოვანი მეგობრობა აკავშირებს და დარწმუნებული ვარ, რომ საქართველოში უამრავი ადამიანია, ვინც რუსეთთან კონტაქტების გაფართოების მომხრეა”.- ამბობს ჯაბანოვი.
„მხარეებმა რუსეთ-საქართველოს ურთიერთობების განვითარებაზე ისაუბრეს”, – წერია ფედერალური საბჭოს ვებგვერდზე.
მათივე ცნობით, პარტია საერთაშორისო ასპარეზზე ქვეყნის ნეიტრალიტეტის ერთგულია და საქართველოსა და რუსეთს შორის ორმხრივად მომგებიანი კავშირების შემდგომი შენარჩუნებისა და განვითარების მომხრეა.
