პოლიტიკას სჭირდება ქალური კულტურა! დროა შევცვალოთ ლამაზად…
თამთა მეგრელიშვილი
იურისტი
დღეს, ქვეყანაში არსებული რეალობა მოითხოვს ახალ იდეებსა და გადაწყვეტილებებს, გრძელვადიანი ინტერესებისა და პრიორიტეტების განსაზღვრას, შიდა და გარე პოლიტიკის თანმიმდევრულ, დაბალანსებულ და სისტემურ გარდაქმნებს საზოგადოებასა და სახელმწიფოში, რაც ქალისა და მამაკაცის გონებრივი პოტენციალის სინთეზს მოითხოვს.
საქართველოს კანონმდებლობით,სამართლებრივ დონეზე არსებული თანასწორობის მიუხედავად, გენდერული თანასწორობის მისაღწევად ქვეყანაში კიდევ ძალიან ბევრია გასაკეთებელი.
იმისათვის,რომ სახელმწიფოს მიერ განხორციელებულმა რეფორმებმა და ინსტიტუციურმა ცვლილებებმა შესაბამისი შედეგები გამოიღონ, აუცილებელია,მოსახლეობის წარმოდგენებსა და დამოკიდებულებებზე მუშაობა. განსაკუთრებულ ყურადღებას კი მოქალაქის, როგორც პოლიტიკური მოქმედი პირის როლი საჭიროებს. ძალიან მნიშვნელოვანია პოლიტიკურ პარტიებში და ზოგადად პოლიტიკაში გენდერული თანასწორობის პრობლემების განხილვა.
პოლიტიკას სჭირდება ქალური კულტურა!
ქალური კულტურის გაგება მოიცავს ყველა ქალს – როგორც აქტიურს, ასევე – პასიურს (დასაქმებულს თუ უმუშევარს, განათლებულს და განათლების გარეშე მყოფს, ძალაუფლების მქონეებს და ძალაუფლების არმქონეებს).
ის ქალები, რომლებიც მუშაობენ ორგანიზაციებში, გაცილებით ძლიერები არიან, ვითარდებიან და კარგად ხედავენ ერთიანობის და სოლიდარობის აუცილებლობას.
ქალურ კულტურაში არ არსებობს იდეალი!
სამწუხაროდ ბევრი ქალი არ მონაწილეობს მასში და არ მიიჩნევს თავს ამ კულტურის ნაწილად და ისინი გადადიან მამაკაცურ კულტურაში, მათი თამაშის წესებით თამაშობენ, ასეთ ქალებს ხშირად ეძახიან „კაცი კაბაში“. ისინი არასოდეს ცდილობენ, დაეხმარონ სხვა ქალებს, ხელი შეუწყონ პრობლემის მოგვარებასა და მდგომარეობის გაუმჯობესებაში…
გარდა ამისა საქართველოს მოსახლეობა ღირებულებების გამოწვევების წინაშეც დგას. ჩვენ თითქოს მხარს ვუჭერთ დემოკრატიას,სიტყვის თავისუფლებას, სამართლიან არჩევნებს და ა.შ., მაგრამ გვახასიათებს მეტ-ნაკლებად კონსერვატიული შეხედულებებიც, ამიტომ, დღევანდელი რეალობა და საქართველოში არსებული დომინანტური პოლიტიკური კულტურა არ ქმნის საკმარის საფუძველს დემოკრატიის სტაბილური განვითარებისათვის.ხარვეზების აღმოსაფხვრელად და არსებული ვითარების გასაუმჯობესებლად ყველა დონეზე, პოლიტიკურ პარტიებსა თუ გადაწყვეტილების მიმღებ სახელმწიფო უწყებებში უნდა დაისახოს სამოქმედო პრიორიტეტები.
უნდა მოხდეს პოლიტიკური სიტუაციის გენდერული მახასიათებლების გაანალიზება;
აუცილებელია შეიქმნას პოტენციურ ქალკანდიდატთა ბაზა;
საჭიროა ქალკანდიდატთა სიებში შეყვანის მონიტორინგი,რომ მათ უკანა პლანზე არ გადაინაცვლონ;
უნდა დაინერგოს ახალგაზრდული პროგრამები,რომლებიც ქალებს პოლიტიკაში ადრეული ასაკიდანვე ჩართვის საშუალებას მისცემს;
საჭიროა ქალთა პოლიტიკაში ჩართულობის მიმართულებით გამოყოფილი თანხების გაანალიზება,რათა განისაზღვროს სახელმწიფოს მიერ გაღებული თანხა, რამდენად საკმარისია გენდერულად სენსიტიური პოლიტიკის გასატარებლად.(რეალურად ამ მიმართულებით დაფინანსების ყველაზე დიდი წყარო დონორი ორგანიზაციები არიან);
საჭიროა მმართველობით პროცესებში ჩართულ ქალებს შორის გამოცდილების ურთიერთგაზიარების კულტურის დანერგვა;
საჭიროა კორექტივები სახელმწიფოში იდეოლოგიის დონეზე;
სასურველია ქალთა გაერთიანებების შექმნა ადგილობრივ დონეზე და მათი გადამზადება;
აუცილებელია, დაინერგოს ქალების პოლიტიკური განათლების პროგრმები, რომლის მიზანი იქნება ქალებში პოლიტიკური ცნობიერების ამაღლება და შემდგომ ქალი პოლიტიკოსების თაობების აღზრდა.
ქვეყანას სჭირდება გონიერი,კონკრეტული საკითხების ირგვლივ კარგად მომზადებული ქალები კადრების სახით!
დროა შევცვალოთ!
შევცვალოთ ლამაზად…