“რომ ჩავედი პატრონი არავინ არ ჰყავდა, ფაქტობრივად, მკვდარი ჰყავდათ, მეგიმ თქვა, რაღაც ტაბლეტი დამალევინესო, სწორედ ამის გასარკვევად მივედი დღეს კლინიკაში” – გარდაცვლილი ექთნის მეუღლე დეტალებს ჰყვება
გარდაცვლილი ექთნის 27წლის მეგი ბაქრაძის მეუღლე მანუჩარ კობახიძე მომხდარში ახალციხის “იმედის” კლინიკის ექიმებს ადანაშაულებს.
როგორც მან ტელეკომპანია “მთავარის” ეთერში განაცხადა, მეუღლეს გაურკვეველი მედიკამენტი დაალევინეს და კლინიკაში დღეს სწორედ ამის გასარკვევად მივიდა.
“რომ ჩავედი პატრონი არავინ არ ჰყავდა. ერთადერთი ბიჭი ადგა თავზე, სხვა არავინ. ფაქტობრივად, მკვდარი ჰყავდათ. უცოდინარობა გახდა მიზეზი. შეცდომა დაუშვეს ექიმებმა. 4 საათი წვინათ ტაფჩანზე.
წინა დღეს მორიგე იყო ჩემი მეუღლე, ამოვიდა სახლში და თქვა, საღამოს ერთი ტაბლეტი დამალევინესო, მეორე უნდა დაელევინებინათ დილით და უნდა აეცრათ. არ იცი რა წამალი იყო, მალავენ ყველა. დღეს ამის გასარკვევად მივედი. მეუღლე მომიკლეს და კიდე აქეთ ცუდი სიტყვებით მომმართეს” – ამბობს მანუჩარ კობახიძე.
ცნობისთვის, შოკში მყოფი ექთანი, მეგი ბაქრაძე გუშინ გარდაიცვალა. 27 წლის ექთანს „ასტრაზენეკას“ ვაქცინის გაკეთების შემდეგ სავარაუდოდ, გვერდითი რეაქცია, ანაფილაქსიური შოკი დაუფიქსირდა.
გუშინ ექთანი თბილისში, პირველ საუნივერსიტეტო კლინიკაში გადმოიყვანეს, თუმცა ექიმებმა მისი გადარჩენა ვერ შეძლეს.