ალეკო ელისაშვილი სააკაშვილზე – „კოკასა შიგან რაცა დგას, იგივე წარმოდინდების – სინანული ნატამალი არ წამოსცდენია, მაშინ, როცა დავით აღმაშენებელმა სიკვდილის წინ „გალობანი სინანულისანი” დაწერა”

„კოკასა შიგან რაცა დგას, იგივე წარმოდინდების,” – ასე აფასებს „მოქალაქეების” ლიდერი ალექსანდრე ელისაშვილი მიხეილ სააკაშვილის განცხადებას, რომელიც მსჯავრდებულმა ექსპრეზიდენტმა საქალაქო სასამრთლოში 7 ნოემბრის საქმეზე საუბრისას გააკეთა.

მისივე თქმით, სააკაშვილს ერთი ნატამალი სინანული არ წამოსცდენია დღეს გრძელი გამოსვლისას, მაშინ როცა დავით აღმაშენებელმა სიკვდილის წინ „გალობანი სინანულისანი” დაწერა.

„რეალურად ეფექტური ქართული სახელმწიფო გვქონდა არასრული 100 წელი და იმ სახელმწიფოს დამფუძნებელმა დავითმა – თავიდან ერთი სოფლის მეფე, რომ იყო და უზარმაზარი საქართველო, რომ დატოვა, სიკვდილის წინ „გალობანი სინანულისანი” დაწერა. სახელმწიფოს კი ვაშენებდი, მაგრამ ბევრი ცოდვა მაწევს და შეცდომაც ბლომად დავუშვიო და მაპატიეთ, რაც შევცოდეო.

დავითმა, აღმაშენებელმა დაწერა ეს! სააკაშვილს კიდე ერთი ნატამალი სინანული არ წამოსცდენია დღეს გრძელი გამოსვლისას. გირგვლიანის საქმე არ არსებობდაო, გელაშვილის საქმეზე მტკიცებულებები არააო, 7 ნოემბრის ამბავიც მიახუთშაბათა ისე აღწერა – არანაირი სინანული, ნატამალი სინანულიც კი. არადა სინანული და გულწრფელი ბოდიში ღირსებაზე მეტყველებს ადამიანის და ეს ღირსება სააკაშვილს, დღეს ოდნავაც არ გამოუვლენია. განა მიკვირს ან ველოდი. მისთვის იყო უკეთესი, მაგრამ – “კოკასა შიგან რაცა დგას, იგივე წარმოდინდების,”- წერს ალექსანდრე ელისაშვილი facebook-ის პირად გვერდზე.