პირველ საუნივერსიტეტო კლინიკიდან დღეს 15 გამოჯანმრთელებულს გაწერენ
თბილისის პირველ საუნივერსიტეტო კლინიკის რეანიმაციაში 8 კოვიდინფიცირებულია მოთავსებული, ორი მათგანის მდგომარეობა კი კრიტიკულად მძიმეა. აღნიშნულის შესახებ ამავე კლინიკის დირექტორმა განაცხადა. ლევან რატიანის ინფორმაციით, მათთან ორი ახალი პაციენტია შეყვანილი, რომლებსაც ჩაუტარდათ კომპიუტერული და კლინიკურ-ლაბორატორიული კვლევები, თუმცა პათოლოგიური ცვლილებები არ აქვთ და მათზე დაკვირვება გრძელდება.
“კრიტიკულ მდგომარეობაში გვყავდა 3 პაციენტი, ერთის მდგომარეობა შედარებით გაუმჯობესებულია. დანარჩენი პაციენტების მდგომარეობა სტაბილურად მძიმეა. კონტროლდება ვიტალური პარამეტრები, – განაცხადა რატიანმა.
კლინიკის დირექტორმა ასევე აღნიშნა, რომ მათ ცენტრში 86 კოვიდინფიცირებული პაციენტი მკურნალობს. რამდენიმე საათში კი 15-მდე გამოჯანმრთელებული პაციენტი დატოვებს კლინიკას.